Aunke e sospechoso ta para riba cu nada a sosode

Fiscal a exigi 3 aña di prison pa homber sospecha di a viola un dama

ORANJESTAD (AAN): Dialuna mainta un homber Colombiano di inicial C. di 54 aña, a para riba den Corte cu e no a viola e dama H., kende tabata hospedando na su cas. El a bisa cu nan tabatin relacion sexual varios biaha.

   Fiscal di otro banda ta haya cu C. ta culpabel di a viola H. y a exigi 3 aña di prison. Abogado mr. Illes di C., a bisa Hues cu no tin ningun prueba di sosten. E ta haya cu tin duda den e declaracion di H. El a pidi Hues pa declara C. liber.

   Viola e dama: E acusacion cu Fiscal a presenta den Corte contra C. ta, cu riba 14 Maart 2024, el a viola e dama H., riba un cama di masashi na C. su cas. Tambe Fiscal ta acusa C. di a haci actonan inmoral cu e dama H. door di mishi na su parti intimo. Hues a haci C. preguntanan y por a compronde cu C. conoce H. kende a bin for di Hulanda na November - December 2023.

   E dama H. a bay hospeda cerca C. Segun C. nan a conoce otro pa un tempo y nan tabatin un relacion amoroso. Hues a bisa cu H. a declara na Polis cu nan tabatin relacion sexual y hasta un dia promer cu 14 Maart 2024. C. a bisa cu dia 14 Maart 2024, el a haci aña y nan a planea pa bay sali. H. a yega laat for di trabao e dia ey y C. a prepara un rum coke p’e. Despues nan a bay come y bebe algun bebida alcoholico. Despues nan a bay cas bek.

   Segun C. na cas el a bay masashi H. y H. a sali sunu for su camber. Hues a bisa cu H. a bisa cu ta C. a kita su paña y masashi. Segun C., esey no ta berdad. El a para riba, cu e no a forza y tampoco a viola H. C. a bisa Hues cu na dado momento, durante e masashi, e tabata kier tin relacion sexual pero H. a bisa no, lanta para y cana bay den su camber. C. a sigui bisa cu e no a haci nada. H. a bay den su camber y C. a keda den sala. Segun C., despues di algun dia H. a piki tur su cosnan y a bay for di e cas.

   Hues a bisa cu loke C. ta splica ta cuadra basta cu loke H. a declara. Hues a mustra cu H. a bisa cu ora el a bisa C. no, C. a sigui tog y a tene relacion sexual cun’e. E dama H. a keda bisa cu e no kier y e ora ey C. a stop. C. a bisa Hues cu algun dia despues, H. a bis’e cu e dia 14 Maart 2024, el a haya un “flash back” (recuerdo) di algo cu a sosode den pasado cun’e cu un otro homber. El a bisa cu e homber a tene relacion sexual cun’e sin cu e tabata kier. Hues a bisa cu e punto cardinal ta si C. a forza H. pa tin relacion sexual. Ta asina cu ta te na April 2024, H. a haci denuncia, ora cu C. tabata busca contacto cun’e pa drecha relacion. C. a bisa Hues cu el a busca contacto cu H. pasobra despues di e incidente di 14 Maart 2024, tur dia H. tabata bay unda C. ta traha y ta sinta wak.

   Fiscal ta exigi 3 aña di prison: Fiscal a bisa Hues cu e ta haya cu e declaracion di H. ta cuadra cu loke el a bisa su amigonan. H. a bisa di tabatin relacion sexual cu C. pero a para esaki y tin amistad cu C. Dia 14 Maart 2024, apesar cu H. a bisa C. pa stop, C. a sigui. Ta ora cu H. a cuminsa yora, e ora ey C. a stop.

   Na opinion di Fiscal, amistadnan di H. a bisa Polis cu H. a bisa nan cu el a wordo viola y cu H. tabata hopi emocional. Fiscal ta haya cu tin prueba di sosten. El a bisa cu e declaracion di C. ta confirma loke a pasa. Tres dia despues di e sucedido, H. a bay for di e cas. Fiscal a conclui cu e ta haya cu tin prueba cu C. a viola H. Fiscal a exigi 3 aña di prison pa C.

   Abogado ta haya cu no tin prueba: Abogado mr. Illes a bisa Hues cu no tin ningun prueba di violacion. Na opinion di abogado, ta solamente e declaracion di H. tin. Mr. Illes a bisa Hues cu emocional no mester influencia husticia pa castiga un sospechoso. Na opinion di abogado, emocional ta un reaccion di un persona y no ta un prueba. E abogado ta haya cu tin duda den declaracion di H. El a mustra cu C. y H. tabatin relacion cu otro y nan tabata hunto den cas di C.

   Na opinion di abogado, ta H. mes a kita su paña y bay drumi riba e cama di masashi. E abogado a bisa cu no tabatin forzamento y tampoco penetracion. Ora cu C. tabata kier tin relacion sexual, H. a bisa no y C. a para keto. E abogado a mustra cu despues di e incidente, H. a keda bay na unda C. tabata traha. Esaki ta pone uno pensa, si realmente H. a wordo viola, pakico e tabata keda bay unda C. tabata traha. E abogado ta haya cu H. a duna declaracion dudoso. El a mustra cu C. tabata habri den interogacion y no a sconde nada. El a bisa cu C. tabata kier tin relacion sexual pero a stop ora cu H. a bisa stop. Abogado ta haya cu no tin prueba di sosten y cu mester declara C. liber. E abogado ta haya cu tin duda kico realmente a sosode.

   Hues a bisa cu e ta bay studia e caso y 2 Februari 2026, lo tin sentencia.