Reunion exitoso di Donald Trump y companianan petrolero kendenan lo bay inverti 100 biyon Dollar den Venezuela

Parlamentario Endy Croes:

• Oportunidad ta bati 1 biaha na Bo porta 

ORANJESTAD (AAN): Parlamentario Endy Croes ta siguiendo hopi di serca e desaroyo di Merca y Venezuela pa locual ta trata petroleo. Dia 9 di Januari ultimo Presidente di Merca Donald Trump a invita 17 companianan di mas grandi den mundo petrolero pa un reunion na White House.  Topico tabata inversion biyonario pa aumenta produccion di petroleo di Venezuela. Por mira atras riba un tremendo reunion cu un apitit hopi halto di companianan renombra.

    Papia di ‘Trafigura’:  Companianan manera Chevron (cu ta na Venezuela caba), Exxon Mobil kende desde 1940 tabata na Venezuela pero tin 20 aña cu e regimen Chavez/Maduro a desapropia tur cos di nan y saca nan di Venezuela, Conoco Phillips kendenan a wordo cori di Venezuela a bisa Trump cu nan a laga atras y perde 12 Biyon us dollar na ekiponan y asina por sigui menciona storianan real pero amargo. Den e invitadonan tambe tabata presente CEO di Trafigura Sr. Richard Holtum.

   Trafigura ta e compania cu a caba di gana  un “tender” pa entrega gasolin, diesel y jetfuel pa Aruba pero te cu awor no a wordo honra pa RDA/FMSA. Croes a sigui e reunion di Trump cu hopi atencion y por mira e interes ta hopi grandi den e companianan multi biyonario pa haci inversionnan biyonario na Venezuela.

   Trump a papia cla: President Trump a bisa e companianan hopi cla y straight forward cu bosonan lo haci inicialmente 100 Biyon us dollar di inversion pa drecha y restructura henter e infrastructura di petrolio na Venezuela cu e obhetivo pa aumenta e produccion. Tanto e companianan lo saca nan placa bek y gana placa, gobierno Venezolano mester haya su fair share pa su hendenan di Venezuela y gobierno Americano lo haya su share.

   Por ehempel president Trump a accentua cu tur materialnan pa cu e inversion mester wordo cumpra na merca. Trump a bisa tambe cu e ta habri pa bende petroleo cu China y Rusia pero na prijs di mercado. Trump a splika alcambio Merca lo percura pa e siguridad (safety)  pa e compania y su trahadornan na tera mientras gobierno Venezolano mester haci cierto cambionan den e structura comercial actual y leynan di hydrocarbon cual nan lo percura pa esaki pasa. Trump y su team di energia ta “deadset” pa logra esaki y companianan a expresa hopi interes y apetit.

   Oportunidad ta bati 1 biaha na Bo porta: Parlamentario Endy Croes ta sigui splika cu e situacion cu a pasa na Venezuela 3 di Januari ultimo unda merca a saca Nicolas Maduro y ta trahando di serca cu gobierno di Venezuela pa logra e cambionan grandi den e transicion ta cambia henter e panorama petrolero no solamente pa Venezuela pero pa Aruba y Curacao y henter region. Aruba por ehempel ta enbuska un di dos pilar economico cual por yuda nos pais  redusi e debe nacional mas liher y crea oportunidadnan di inversionnan grandi, empleo, placa adicional pa caha di gobierno, aumenta nos GDP y un bida briyante pa nos hendenan y sigur pa area di San Nicolas.

   Ta e momento oportuno pa e gobierno di turno “stand up”  cu un  vision concreto riba e tema . Mester bin un decision pa explora cu e companianan cu lo bay inverti 100 BIYON us dollar e rol di refineria di Aruba y Curacao tanto den storage y refina.

   Berdad e refineria di Aruba por ta deteriora  almomento pero mescos esnan na Venezuela ta y e infrastructura ayanan tambe lo wordo renoba segun expertonan a papia di un mix di renoba un parti y trece otro ekiponan up to standard. Parlamentario Endy Croes ta pidi gobierno atende esaki cu tur seriedad sin waak color politico y lo pidi un reunion publico pa hiba e discusion aki den Parlamento.  Ban sirbi e interes general riba e tema aki cu urgencia.