Polis lo intensifica controlnan cu man duro

Mensahe di Altocomisario di Polis, señor Ramon Arnhem:

ORANJESTAD (AAN): Nos ta apenas na mita di e prome dos siman di aña nobo y ya Aruba a wordo confronta cu varios accidente serio di trafico den e prome dianan di aña 2026, cu a causa hopi tristeza y dolor profundo den famianan cu lamentablemente a perde nan sernan keri.

   Altocomisario di Polis, señor Ramon Arnhem, a dirigi un mensahe na nos comunidad, expresando su gran preocupacion y enfatisando e responsabilidad personal di cada ciudadano. El a adverti cu comportamento imprudente riba careteranan publico ta trece consecuencianan legal serio.

  Altocomisario Arnhem a remarca cu e incidentenan lamentable aki a wordo causa pa conducta iresponsabel, manera exceso di velocidad y maneho bou di influencia di alcohol. Den nomber di Cuerpo Policial di Aruba, señor Arnhem ta haci un apelacion urgente na tur usuario di trafico pa respeta e reglanan di trafico, baha velocidad, no bebe y stuur, y tene consideracion cu otro riba nos careteranan.

   Altocomisario Arnhem a declara cu Cuerpo Policial di Aruba lo intensifica controlnan y a enfatisa cu esaki lo wordo haci cu man duro. “Nos tey pa e siguridad di Aruba, di tur nos sernan keri. Ban keda enfoca riba un trafico sigur. Nos tur ta responsabel pa esaki”, Altocomisario Arnhem a termina bisando.