Atende cu suicidio y prevencion ta pidi accion y no excusa

Parlamentario Rocco Tjon:

ORANJESTAD (AAN): Ultimo tempo, Aruba ta wordo confronta cada biaha mas cu noticia tocante suicidio y intentonan di suicidio. Tras di cada caso tin sufrimento profundo y famianan cu ta keda atras cu hopi pregunta. Esaki por a wordo evita? E crecemento y visibilidad di e casonan tragico aki ta mustra un desaroyo preocupante cu no por wordo ignora.

Suicidio ta un reto social. Salud mental, presion social y acceso na ayudo ta hunga un rol central. P’esey mes, ta na gobierno, y specificamente e minister encarga cu Salud Publico, tin un responsabilidad grandi. Prevencion, señala trempan y capacidad suficiente den e sector di salud mental mester ta prioridad.

-Gobierno no a aloca mas fondo pa atende cu salud mental

Ora nos tene esaki na cuenta e ta lamentabel y alarmante cu minister Mervin Wyatt Ras a indica cu no lo pone recurso adicional pa e sector aki, y den presupuesto 2025 y 2026, mocionnan pa aloca mas fondo pa e sector aki a ser desaproba pa fraccionnan cu ta sostene Gobierno.

-Cua maneho y programa Minister Wyatt-Ras a introduci

E posicion aki no ta cuadra cu e señalnan creciente for di comunidad y cu e presion ya conoci riba e sector aki y su profesionalnan. Reconoce un problema sin inverti no ta un solucion. E situacion ta lanta mas pregunta ora nos wak e pasado politico di e minister. Ora e tawata parlamentario, e tabata un critico fuerte di e maneho pa atende cu salud mental y el a declara cu e tin tur solucion. Awor cu e tin responsabilidad ehecutivo, e mester indica kico concretamente e a cambia pa atende cu e situacion actual.

-Preguntanan na e mandatario

Pa e motibo aki tin 40 pregunta a wordo haci na e mandatario. Specialmente dirigi na e accion concreto di e minister desde cu e a drenta den funcion. Cua medida a wordo tuma? Cua iniciativa nobo a wordo lansa? Cuanto fondo adicional a wordo aloca?