E base financiero cu gobierno di MEP a establece ta locual a conduci na surplus

Parlamentario Evelyn Wever-Croes

ORANJESTAD (AAN): Apenas 9 luna despues cu Partido MEP a entrega gobernacion, comunidad di Aruba awor por confirma e berdad. MEP ta hayando rason, e base financiero cu gobierno di MEP a establece, ta cual a conduci na surplus pa nos pais, a cuminsa brinda bienestar y progreso den forma consistente y sostenibel. Di recuperacion, pa surplus, pa progreso y bienestar. 

“No tabata facil, pasobra nos a encontra e pais, na 2017, den un crisis financiero sin precedente, na momento cu e gobierno prome cu nos, gabinete Mike Eman 1 y 2, a redobla e debe di nos pais, hibando Aruba na borde di bancarota. Confiansa financiero den Aruba a bay perdi, instancianan internacional a down grade Aruba, y Hulanda a impone un sistema di supervision financiero, un curatela financiero den forma di un KB, un Koninklijk Besluit”, lider di MEP a bisa durante conferencia di prensa. 

Desde november 2017, Gabinete Wever-Croes 1, mester a pone enfasis riba recuperacion financiero. Sinembargo, e pandemia mundial Covid-19 na 2020 a bolbe causa un crisis financiero y economico.

A sigui e siguiente periodo di Gabinete Wever-Croes 2, den cual mester a pone prioridad  na crea un fundeshi financiero fuerte y solido pa Aruba, cu por resisti cualkier crisis, sea ta crea pa hende, manera e crisis financiero cu Mike Eman y su gabinete a ocasiona na añanan 2009-2017, of pandemia mundial, manera Covid-19. 

Mester a crea espacio financiero tambe pa gobierno di MEP por  haci inversionnan atrobe, sin causa debenan gigantesco manera e gobierno anterior, y cu e espacio financiero a cuminsa duna alivio bek na comunidad. 

“Awe ta bolbe resalta cu e fundeshi financiero solido cu ex-minister Xiomara Maduro y su ekipo financiero a construi, ta sigui produci surplus, apesar di un gobernacion actual cu no ta parce cu tin un rumbo cla. Tin biaha e ta parce mas bien un barco sin capitan. 

Nos trabou desde oposicion ta pa vigila nan di cerca, pa evita cu nan ta trece cambio y afecta  structura y fundeshi financiero cu nos a logra cu hopi esfuerso, sacrificio y dedicacion. Nos a tuma pasonan concreto pa recupera rapido e capacidad financiero y economico di Aruba, pasobra nos tabata confia den e capacidad y resiliencia di pueblo Arubiano. Y ta esey a brinda e espacio financiero pa duna entre otro, e aumento di pensioen na nos grandinan, e aumento di onderstand, e aumento di salario na docentenan. 

"Mi ta sinti un orguyo grandi di mira tur esaki posibel, danki na e vision y determinacion di mi gobiernonan, Gabinete Wever-Croes 1 y 2”, tabata e declaracion di lider di MEP Evelyn Wever-Croes den e prome conferencia di prensa.