Programa di sterilisacion masal ta evita 49 mil animal di caya den un aña

Segun Animal Welfare Alliance Aruba

ORANJESTAD (AAN): Animal Welfare Alliance Aruba (AWAA) a anuncia cu su programa di sterilisacion masal a preveni un estimacion di 49,000 cacho y pushi di nace den situacion di caya solamente den aña 2025. Esaki ta marca e aña mas impactante di e organisacion te awor.

Mientras accionnan di rescate ta sigui salbando bida tur dia, AWAA ta enfatisa cu rescate solamente no por resolve e crisis continuo di sobrepopulacion di animal na Aruba.

 “No nos por rescata nos salida for di e problema di  sobrepopupacion,” Mercedes de Bruyn, miembro di directiva, di AWAA ta bisa. “Rescate ta salbando bida awe, pero sterilisacion ta cambiando futuro.”

E cifra nan di sterilisacion di AWAA ta mustra un crecemento fuerte:

​•​2023: 1,500 animal sterilisa

​•​2024: 2,700 animal sterilisa

​•​2025: 4,687 animal sterilisa

Esaki ta trese e total di animal sterilisá pa AWAA na 8,887.

Segun datonan di AWAA, e sterilisacionnan hasi na 2025 solamente ya caba a prevení nacemento di ​28,000 cacho y ​21,000 pushi.

E cifranan aki ta representa decena di mil animal cu a wordo salva di un bida di hamber, malesa, negligencia, abandono, y sufrimento riba caya.

“Sterilisacion masal ta e unico manera proba pa baha e number di animal c uta drenta den e sistema, alivia presion ariba rescatistanan, y proteha bienestar di animal na largo plazo,” segun AWAA. “Ora nos baha nacemento na e fuente, henter e sistema ta bira mas humano y sostenible.”

 AWAA ta sigui traha hunto cu rescatistanan, voluntarionan, y miembronan di comunidad riba henter e isla, reconociendo cu mester di prevencion di demas di rescate, concientisacion y educacion pa crea un cambio duradero.

-Agradecimiento na Voluntarionan y Sponsoronan

AWAA ta expresa su agradecimiento profundo na tur voluntarionan  arriba y pafor di Aruba cu a contribui durante aña 2025 pa logra e resultado extraordinario aki. Nan amor, dedicacion y perseverancia pa bienestar di animal ta inmenso. Sin e compromiso di nos voluntarionan, etrabou di AWAA no lo ta posibel.

AWAA tambe ta gradici tur sponsornan cu a sostene nos trabou financieramente , a la vez tur nos sponsornan di cuminda y e partnernan cu a contribui cu sponsoring di nos edificio. E apoyo financiero y logistico di nos sponsoronan ta esencial pa garantisa cu nos por sigui ofreciendo sterilisacion y cuido na e escala cu Aruba mester .

Hunto cu e apoyo di nan boluntario y sponsornan, AWAA ta creando un cambio real y duradero pa bienestar di pushinan y cachonan na Aruba.