Victima di hincamento grave na Shiribana toch no kier duna informacion ni ricibi yudansa

ORANJESTAD (AAN): Tabata Bispo di Aña Nobo, algo despues di 12:00 pm cu autoridad a ricibi informacion cu un maltrato severo a

caba di socede na Shiribana, na e cas “conoci pa Husticia” riba caminda principal di Paradera pa Tanki Leendert.

   Sabiendo cu esaki ta un area hopi fastioso cu hendenan dudoso canando den e area aki, ta diferente unidad di Polis a wordo manda cu urgencia.  A pone Centro di Alarma tambe na altura, y a core manda Ambulance tambe.

   Ora cu a yega, a bin haya un persona masculino cu tin algun hinca no mucho severo na su curpa.  Pero di prome instante, ya caba e victima a laga sa cu e no ta desea asistencia medico, tampoco e no kier duna declaracion.  Paramediconan a yega y eynan mes nan a revisa su heridanan.  Pero el a keda nenga di bay pa Hospital.

   Varios persona a indica cu ta 2 hende a ricibi golpi y/of hincamento.  Ta un grupo di homber a yega eynan den un auto compacto, y a ataca e duo.  Un di e victimanan a durante a atake, a core bay sconde den e cas pa asina no haye.  Pero e otro victima a ricibi hinca serio na curpa.

   Testigonan a splica cu e grupo di atacante a uza machete y otro obheto skerpi pa ataca nan cu ne.  Nan a describi e grupo como 4 hende no-local, y nan tabata den un Kia Picanto color di plata.

   Polisnan a notifica e instancianan concerni y a cera e area unda e kapmento a sosode, cu ta pabao di e cas cerca di un compania di yabi y lock, pa cuminsa investigacion. 

   Lamentablemente e victima no tabata desea atencion medico y tampoco kier a bisa polis algo. E incidente ta bao investigacion.