Conocido empresario Leo Laclé a fayece durante su vakantie na Merca

Conoci pa su negoshi Aruba Video Center

ORANJESTAD (AAN): Riba Diasabra mainta a drenta e tristo noticia, cu e comerciante y ciudadano respeta, Leopold D. Laclé mihor conoci como ‘Leo’, a fayece durante cu e ta cu vakantie na Merca.

   Naci na Aruba dia 9 di November 1941, Leo a biba pa 84 aña y den su desaroyo como empresario di trempan caba a sa di trece hopi aspecto innovador na Aruba cu a sa di haci e isla bira hasta ‘frontrunner’ den cierto negoshi, y cu despues a plama na nivel mundial.

   Desde decada di 1970, hunto cu su ruman Patty Lacle (dfm), nan a probecha di e hecho cu na Aruba tur hende tabata mira solamente 3 canal (tin biaha 4 canal, depende di tempo) di TV.  Tele Aruba e tempo ey tabata cuminza transmiti 5:00 pm, y e resto di canalnan tabata for di Venezuela.  E tempo ey CableTV no tabata existi ainda riba e isla.

   Leo hunto cu su ruman Patty, a bin cu e idea pa graba programanan di CableTV na un ciudad na Merca, uzando videocassette di e formato U-Matic e tempo ey.  E videocassettenan aki tabata wordo manda na Aruba, unda tabata duplica nan, y asina Aruba Video Center den Emanstraat a nace.   E compania a cuminza importa y bende algun U-Matic Video Players, cu ciudadanonan por a cumpra y asina por pasa huur peliculanan y otro tipo di programa, pa nan mira na cas.

   Esaki a bira popular na final di decada di 1970, y hasta Time Magazine a yega di raporta algo chikito riba loke rumannan Lacle ta haci, pa indica cu nan ta cuminzando algo nobo den e industria, y a menciona aki ‘Home Video’.

   Home Video despues a bira un industria completamente riba su mes, cu a crece enormemente na Merca y despues rond mundo cu bendemento di pelicula, of huur di esaki riba videocassette.

   Na Aruba tambe, e compania Aruba Video Center a crece y dado momento Leo a hasta patrocina su popular team di Baseball cu tabata hungando e tempo ey pa Amateur Baseball Bond Aruba (Liga ABBA) cu tur anochi tabata conoce stadionnan yen.  E team di Aruba Video Center cu algun bateador iconico, a logra conkista varios titulo di Campeon di Aruba.  Hopi hende ta convenci cu danki na apoyo di Aruba Video Center, cu Baseball di Aruba a conoce un empuhe nunca antes bisto.

   Diripiente e compania na Aruba cu tabata opera cinema, a sinti cu huurmento di Videocassette tabata daña nan negoshi, y a hasta entabla caso den Corte.  Deurwaarder a yega na Aruba Video Center y a confisca tur videocassette.  E caso den Corte a hala atencion no djis di prensa di Aruba, sino di Antiyas tambe.  Finalmente e compania di cinema a perde e caso, y Hues a duna ordo pa debolbe tur videocassette bek na Leo Lacle, y cu e por sigui numa cu huurmento di video.

   Leo Lacle ademas di huur video, a start tambe un broker di aseguro, yama ‘Nos Seguro’ situa den Hendrikstraat na Playa.

   Aruba Video Center despues na final di decada di 1980, a bira un powerhouse di bende, instala, y service Satellite Dish antenna e tempo aya, cu tabata di tamaño di 12 pia, 14, pia, y 16 pia.  Hendenan na Aruba porfin por a cuminza mira canalnan di Merca, di Mexico, y tambe di Brasil en vivo.  Despues di tempo, el a cuminza bende Satellite Dish mas chikito, y alavez a drenta den e mundo di huur DVD tambe.

   Leo Lacle tabata un persona hopi social, kende gusta combersa y papia riba e desaroyo for di e Aruba di antes te cu esun di awor.  E tabata stima su famia, su yiunan, y su nietonan.

   Gozando aworaki na December di un vakantie bon mereci, riba Diasabra mainta a bin descubri cu e no ta reacciona.  Pues el a fayece den su soño.  E siman aki lo bay haya sa si famia lo bay logra trece Aruba for di estado di Vermont (parto Noordoost) na Merca pa su entiero.  Na famianan di e fayecido, specialmente su casa Deta, DIARIO ta extende palabranan di condolencia.