Hobencito di 5 aña cu a wordo trapa door di vehiculo ta keto bay den Intensive Care

Su mayornan ta pidi pueblo pa oracion

ORANJESTAD (AAN): Den fin di siman, DIARIO a ricibi update di fuentenan relaciona cu e caso grave cu a socede Diabierna atardi den Wolfstraat na Noord.  Esaki ta un pida caminda di santo cu ta desemboca riba Figaroastraat di e casnan di pueblo.

   Den oranan di atardi, e hobencito J.O. di 5 aña di edad, kende tambe ta biba den e caya aki.  Pa di dos biaha den su bida, e hobencito a bay ‘hunga’ na cas cerca e yiunan di e bisiña cu ta biba dos cas mas leu di nan.  E famia di e cas a haya esaki un bon idea, y e hobencito a bay goza di su Diabierna merdia y atardi eynan.

   E hobencito ta gusta hunga den tera, y pesey tabata pafo riba tereno di e cas, abao ta hunga cu tera.  Net banda di 2:20 pm, un señora kende tambe ta biba na e cas a yega cu su vehiculo SUV, Hyundai color blanco.  Famianan na e cas a mira e vehiculo yega, y a yama tur mucha pa bin paden.  Pero e hobencito bisiña no a reacciona riba e yamada aki, y a djis keda abao ta hunga.  E chauffeur pa malasuerte no a mira e mucha ta hungando abao, y a djis drenta normal staciona e vehiculo.

   Aki ta unda cu e vehiculo a pasa dal e mucha, pone cay boca abao, y e wiel a pasa riba su lomba.  E movimento aki a pone e chauffeur stop, y ora di baha a bin topa cu e escena espantoso di e hobencito cu cara tur na sanger.

   E hecho cu e Hyundai SUV aki ta tiki halto, e chauffeur femenino no a mira e mucha ta hungando den tera, pues inocentemente a pasa riba dje.  Aki no por papia di nada intencional.

   Hobencito den Intensive Care: Ora cu Ambulance a yega, cu hopi cautela a pone e mucha riba e brancard, cu su cara ainda tur na sanger.  Cu urgencia a hibe pa Servicio di Emergencia na Hospital.

   Na Servicio di Emergencia, a bin nota cu e hobencito tin diferente herida, di cual algun ta mas profundo cu e otro.  E peso di e vehiculo primi na curpa di e mucha riba e piedranan eybao, kizas a ocasiona esaki.  Tambe a core saca X-Ray pa mira si tin weso kibra.

   Milagrosamente e hobencito no a fractura ningun weso.  Sinembargo su pulmon banda drechi a keda hopi delicado, y ta den Intensive Care Unit pa vigila esaki den e prome 72 oranan.  E hobencito ta balente, como cu e ta na tino y ta mustrando di ta un luchado pa asina e sali for di e situacion precario aki, pa recupera su salud.

   Su famia ta constant cerca dje den Intensive Care na Hospital, y nan ta agradecido pa tur e atencion di demas famia.  Nan a splica claramente cu nan no a keda cu ningun rencor pa e bisiña, como cu nan ta considera esaki como un accident, ya cu e lo por pasa cu kende cu ta.  Nan ta pidi famia y amigonan pa sigui haci oracion pa e hobencito J.O. por recupera rapidamente.  Tambe ta pidi oracion pa e bisiña, kende a wordo hopi afecta pa e accident aki.  Famia a indica cu nan tin hopi fe den Dios, y ta spera cu comunidad por sigui haci oracion pa yuda e hobencito.