Comunidad riba Diasabra anochi a core yuda como 300 pasahero stagna na Aruba

Nan tur a haya un cama pa drumi riba dje

• Gobierno y ATA a core haci un suplica urgente 

ORANJESTAD (AAN): Manera cu DIARIO a trece den su edicion di Diasabra, henter e region Noordoost di Merca a wordo azota pa un tormenta fuerte di sneeuw, cu no a djis interumpi bida di ciudadanonan, el a afecta gravemente tur vuelo den region y stroba e plannan di pasaheronan.

   El a cuminza desde siman pasa caba, y pa puro suerte ningun vuelo for di New York, Boston, y Newark pa Aruba a wordo afecta.  Sinembargo vuelonan di regreso si a conoce cancelacion.

   E situacion riba Diasabra a empeora, ora cu New York a conoce e caida mas pisa di sneeuw den cuatro aña, y tur cos tabata blanco.  Riba Diasabra mes, mas di 900 vuelo a wordo cancela, di cual mayoria ta den e area di New York.  Consecuencia di esey ta cu mas di 8000 vuelo a wordo afecta rond di e pais y tambe internacionalmente.

   Area afecta tambe a inclui Aruba.  Aunke varios vuelo a yega bek Aruba, toch tabatin como 3 vuelo cu a wordo cancela.  Otronan a wordo posponi te oranan di Diasabra anochi, pasobra e ora tabatin indicacion cu tempo lo mehora den parti Noordoost di Merca.

   Problema na Aruba: Pero e vuelonan cancela aki na Aruba (incluyendo uno pa motibo di dificultad tecnico) a trece dolor di cabez.  Debi na high-season y cu mayoria Hotel ta yen debi na temporada di Pasco y Aña Nobo, tabata nota cu como 300 pasahero lo no haya lugar pa hospeda Diasabra anochi na Aruba.

   E situacion aki a pone cu Aruba Tourism Authority a bati alarma na Gobierno, y asina a core tene reunion na Oficina di CMO (Crisis Management Office).  Aki a reuni diferente stakeholder, como tambe Prome Ministro Mike Eman, y Ministro di Turismo, Wendrick Cicilia.

   Vuelonan cu a keda cancela ta jetBlue 1058 di 12:50 pm pa JFK na New York.  Tambe a cancela Delta 1761 di 1:35 pm pa Boston.

   Mester di espacio pa acomoda 300 turista, y banda di 7:45 pm, Gobierno a convoca un conferencia di urgencia unda cu Prome Ministro a papia y indica cu nan ta pidi tur habitante na Aruba cu por tin un acomodacion ‘Short Term Vacation Rental’, sea ta condominium, apartamento, un cas, pa contact mesora e anochi ey mes cu Aruba Tourism Authority.

   Y e reaccion di comunidad tabata sublime, y DIARIO a compronde cu na final ta tur 300 pico pasahero a haya un lugar y dak riba nan cabez pa pasa un anochi bon.  Aki nan a mira con e hospitalidad di comunidad ta yuda pa ofrece cama den oranan di urgencia.  E turistanan alaves lo keda encanta cu e hospitalidad aki.