Accident fuerte entre sedan y un SUV riba caminda di Tamarijn

ORANJESTAD (AAN): Diamars anochi tabatin en total 2 accident riba caminda di Tamarijn.

   Esaki ta esun cu a socede prome.  Tabata riba Diamars anochi banda di 10:30 pm, cu Central di Polis a manda patruya di Santa Cruz cu urgencia pa e caminda di Tamarijn pa Sero Pita, pa check un accident grave na e lugar di costumber.

   Yamada a drenta cu tin hende herida, y pesey ademas di Polis, a core notifica Centro di Alarma cu na su turno a despacha dos ambulance pa e lugar.

   E patruya cu a yega na altura di Tamarijn 54, a bin topa cu un auto y un vehiculo.  Tabata trata di un vehiculo tipo SUV, esta Chevrolet Equinox color blanco, y un auto sedan Hyundai Accent color blanco. 

   Riba e caminda por a mira un lastro basta largo di brake, cu tabata di e Hyundai Accent.  Testigonan a conta cu e Chevrolet Equinox a subi caminda for di banda pazuid, momento cu e Accent tabata biniendo cu velocidad basta halto.

   A sali na cla cu un persona a keda herida den e accident aki, y cu Ambulance a wordo hiba pa Servicio di Emergencia na Hospital pa mas tratamento.

   Un rato despues, como 1 km mas leu, un otro accident serio a socede, y esey por lesa den otro relato.