Dilanti Hues a presenta Homber cu a hinca su amigo cu screwdriver den garganta

ORANJESTAD (AAN): E homber di inicial G.K. a presenta den sala di Corte di Husticia, pa e caso penal cu Ministerio Publico a cuminsa contra dje.

   Fiscal a acusa G.K. cu riba 13 Juni 2021 a purba mata e homber W. usando un arma un screwdriver.

   Den sala di Corte e homber W. a presenta y a bisa Hues cu nan ta bon amigo. Ta W. a hiba G.K. Corte. El a pidi pa no castiga G.K.

   HINCA NA GARGANTA:

   Segun G.K. el a pone screwdriver na garganta di W., pero no pa hink’e. Hues a bisa cu na hospital a constata cu W. a sufri 3 hinca na garganta. G.K., a bisa cu e tabata hopi bebi. G.K. a bay na cas di W. pa entrega un petchi pero a kibra un bentana cu un piedra y despues a agredi W.

1. tabata presente den sala di Corte. Hues a bisa cu W. a declara na Polis cu nan tabata bebe y a pidi G.K. su petchi. G.K. a bis’e cu e petchi a perde. Ora W. tabata cana bay, G.K. a yam’e y mustr’e e petchi. W. a rabia y via di aplicacion di Whatsapp el a manda mensahenan basta pisa pa G.K. Despues W. a arepenti loke el a haci y a pidi pa no castiga G.K.

   Ora G.K. a bay na e cas, el a mira W. cu un biga. E ora ey G.K. agredi W. Despues di algun dia, G.K. a bay pidi W. dispensa. Nan ta bon amigo cu otro. Segun G.K. ora el a sali for prison, el a bay CAA y awor e tin 3 luna clean. E ta sigui bay meeting di CAA.

   FISCAL:

   Fiscal a bisa cu e ta haya legalmente proba cu G.K. a agredi W. cu un screwdriver. Fiscal ta haya ironia cu W. ta pidi pa no castiga G.K. Pero si mira e heridanan di hinca y loke dokter ta bisa, e por tabatin consecuencia fatal.

   Fiscal a exigi 40 ora di trabao pa comunidad of 20 dia sera. Tambe Fiscal a exigi 1 luna di prison condicional cu 2 aña di prueba.

   ABOGADO:

   Mr. Thielman a bisa Hues cu G.K. a bisa cu el a pone screwdriver na garganta di W. Nan tabata bringando. E heridanan tabata net bou otro. Normal si tabata hinca mes lo tabata diferente parti na garganta. Nan tabata bringa door cu W. tabatin un pida palo den man.

   E testigo dama a bisa cu ningun momento G.K. a hinca W. sino a pone screwdriver. Na opinion di abogado, tabata herida leve y nada grave. E dama a kita e screwdriver y G.K. y W. a bay for di otro. Su siguiente dia nan a bay papia cu otro. W. a bay haci denuncia pasobra cu G.K. a zundr’e pero no cu el a worde hinca. E abogado a bisa cu si tog ta haya cu G.K. a maltrata, e ta haci apelacion riba defensa propio door cu W. tabatin un pida palo den man.

   SENTENCIA:  Hues a sera tratamento di e caso y a dicta sentencia di biaha. Hues ta haya legalmente proba cu G.K. a hinca W. cu e screwdriver. Hues a remarca cu G.K. no a bay hiba e pechi back, el a kibra glas na cas di W. cu un piedra y ora W. a sali, el a saca screwdriver y agredi W. Hues a bisa cu esey no ta defensa propio.

   Pa cu e castigo, Hues a bisa cu e ta tene cuenta cu den pasado caba a condena G.K. pa maltrato. Hues a confirma exigencia Fiscal. El a condena G.K. na 1 luna di prison condicional cu 2 aña di prueba y 40 ora di trabao pa comunidad y si no cumpli, e lo mester bay 20 dia sera