Ban Bek Caya tabata hopi bon bishita den fin di aña

ORANJESTAD (AAN): Den fin di siman tabatin e ultimo edicion di Ban Bek Caya, Christmas Edition a transforma Caya Grandi den un verdadero ambiente di fiesta,

union y alegria di Pasco. Desde tempran, e comunidad a responde cu entusiasmo, creando un fluho constante di bishitantenan cu a bin disfruta di ofertanan especial, entretenimento y e calor di e temporada.

   Tur plaza a aporta su propio vibe y atraccion. Na Plaza Daniel Leo e publico a disfruta di presentacion musical cu Katatumbo, DJ Devin, Muchanan di Mama Rosa y DJ Steve Andreas. Plaza La Linda a combina musica, moda y cultura cu DJ Splash, Chicas Gaiteras y un fashion show vibrante. Na Ana Catharina, DJ Doble R y Grupo Melodia a pone e tono musical di e anochi.

   Pa e famianan, Plaza Pro Fashion a ofrece un Kids Corner y Kidspreneur Bazaar, creando un espacio interactivo pa mucha. Plaza Cultural a trece e ritmo di Vallenato Plus, mientras cu Plaza Nikkie Habibe a celebra tradicion cu Aguinaldo Flor di Pasco y Dushi Vibes. E experiencia a completa cu musica riba e Tram, cu DJ Ritmo manteniendo e energia pa henter Caya Grandi.

   Comerciantenan a prepara cu promocionnan special di Pasco y a expresa nan gratitud pa e sosten di e comunidad. Gobierno ta sigui respalda iniciativanan manera Ban Bek Caya pa fortalece comercio local y revitalisa e centro di ciudad.

   Cu esaki, Ban Bek Caya, Christmas Edition a cera e aña di un manera bunita, celebrando comercio, cultura y union comunitario.