Parlamentario John Hart djis kier sa kende a beneficia di e deal di Eagle LNG

ORANJESTAD (AAN): Parlamentario di AVP, John Hart, a expresa su asombro y indignacion despues di scucha e entrevista cu presidente di SIWA a duna durante un noticiero dos siman pasa,

ya cu segun Hart, e contenido di e entrevista a lanta preguntanan serio riba integridad y transparencia, preguntanan cu awe, ironicamente, ta exigi cu stem halto pa esunnan sinta den banki di oposicion, specialmente  fraccion di MEP.

   “Ta importante pa aclaria cu integridad y transparencia no ta palabra pa grita segun ta cumbini, pero principio cu bo mester a aplica tambe ora bo tabata na poder,” asina Hart a declara. Segun e, e pregunta cu lider di oposicion ta haci awe, por y mester wordo haci tambe na nan mes, mirando atras na hopi asunto pendiente y sospechonan di corupcion durante nan periodo di gobernacion.

   Durante e entrevista, presidente di SIWA a expresa su profundo desacuerdo cu e manera scur cu a haci cambio den e statuut di WEB N.V., specificamente den e composicion y posicion di Hunta di Comisario. Entre e cambionan mas alarmante, ta e estipulacion cu ora tin un cambio di gobierno, e hunta por keda tres aña den funcion sin cu e gobierno nobo por interveni, y cu ora finalmente por kita nan, mester paga nan un compensacion ekivalente na tres aña di salario. Segun Hart, esaki ta un ehempel cla di cudishi personal cu no ta tuma na cuenta e bienestar di WEB Aruba NV ni di pueblo Arubiano.

   Mas serio ainda, ta e decision pa kita for di e statuut e articulo cu a stipula cu pa bende shares di WEB Aruba NV, mester aprobacion di dos tercer parti di Parlamento. E statuut nobo awor ta duna Utilities Aruba NV e autoridad pa bende shares sin ningun tipo di aprobacion parlamentario.

  “Esaki ta nada menos cu pone Parlamento buitenspel y pone patrimonio di pueblo na riesgo,” Hart a subraya.

   E sindicalista a declara cu el a “bati bel” prome cu e ultimo eleccion cerca stakeholders y parlamentarionan di e tempo, incluso informando e Minister President di e tempo ey, kende a bagatelisa e preocupacion bisando cu no ta bay tin cambio den statuut. Awe, despues di eleccion, e cambionan drasticonan a keda implementa den silencio.

   “Anto ta esunnan mesun aki tin e curashi pa papia tur dia di integridad, transparencia y autonomia?” Hart ta puntra. “Unda nan integridad tabata ora a haci e cambionan aki manera ladron den anochi, sin debate publico y sin Parlamento?” Pero preguntanan cu mester wordo contesta ainda den Parlamento ta: Cuanto placa di pueblo a bay na deal di Eagle LNG? Ken e deal aki a beneficia? Y ken ta para responsabel?

  Parlamentario Hart a conclui cu Aruba por ta gradicido cu ultimo eleccion a trece un cambio di gobierno. “Si no, no kier ni imagina kico lo tabata e futuro di WEB Aruba NV, un patrimonio di pueblo, den man di e hendenan aki. Mester defende integridad y transparencia cu echo, no cu palabra bashi. Het kan verkeren.”