Asistencia na Misanan di Aurora ta mustra cu e esencia di Pasco di Nacemento ta persisti

ORANJESTAD (AAN)-- E fielnan creyente cu pa cierto motibonan no por asisti na e Misanan di Aurora presencialmente, pero ta sigui e Eucaristia via television,

alomenos aki na Aruba, ta sinti cu e esencia di Pasco di Nacemento for di un perspectiva Cristian ta persisti den e celebracion di nacemento di e Yiu di Dios cu a bira hende: Hesus Cristo, e Salbador cu ta trece amor, speranza y redencion na humanidad.

E cuater prome dianan di e Nobena, por a mira cu Misa Immaculada Concepcion di Santa Cruz, tabata basta yen, y esnan cu ta sigui e Misa di Sufisant na Curacao via cable, y cu a biba aki na Aruba, tambe ta contento di mira tantisimo hende, un iglesia full, full yen.  Y por asumi cu den tur Parokia, e FE y Amor pa celebra Hesus su nacemento, ta sigui mesun bibo y ferviente den otro parokianan unda mayoria ciudadano ta Cristian, y den e caso aki Catolico.

E FE y speranza cu ta biba den cada un curazon aki, ta ferviente y imbatible. Logicamente cada un cu nan virtudnan y fayonan humano, pasobra ningun di nos ta santo, pero mirando tanto hende, y hopi cu ta presenta den famia, ta trece un sentimento special, confianza y certeza cu Hesus ta bibo, y cu e ta manifesta su mes den e fidelidad di cada persona, adulto, mucha y hoben cu sa lanta trempan pa sigui e nobena di Misa di Aurora. Aruba sigur, ta un pueblo di FE y di nobleza bendiciona pa nos Señor, Tata, Yiu y Spirito Santo y nos Mama Maria, un gran pilar di nos Fe y Amor pa Hesus su Yiu.

Logicamente, no por kita afo e parti di haci compras, cumpra algo leuk pa bisti, algun regalito, y percura pa un Cena, pasobra esaki ta parti di un tradicion, mas cu di materialismo, y den e sentido aki ta un aporte importante di nos comunidad pa Aruba su Economia, locual ta necesario tambe.