Interpol a gara sobrino busca pa caso asesinato na Solito

Crimen di Luz Divina Faña haya den freezer

• Aresto di Adrián Faña na Republica Dominicana
• Confirmacion cu e curpa no a wordo mutila 

ORANJESTAD (AAN): E noticia grandi di final di November, unda a bin haya e curpa sin bida di señora Luz Divina Faña di 60 aña den un freezer na su bunita cas na Solito, a keda di ta topico di combersacion ultimo simannan.  E sospechoso principal a huy for di Aruba, pero awor a haya detaye cu el a ser gara door di Interpol na Republica Dominicana.

   Manera ta conoci, pa como dos siman e trahador balente Luz Divina Faña no tabata presenta na trabao na un conocido Restaurant na Eagle Beach.  Su compañeronan di trabao tabata haya esaki raro, como cu e ta un persona kende semper tey pa cumpli cu su labornan.  Su amiganan tambe a cuminza preocupa cu nan no ta mire.  Na su cas tin dos apartamento, y esnan aki a tende cu e lo a core haci un viahe di emergencia pa Republica Dominicana.  Esey ta algo inusual di Luz, como cu semper e ta duna tur hende detaye ora cu e ta core haci algo.  E storia a empeora ora cu a dicidi na yama Republica Dominicana, e famianan aya abao a keda sorprendi, pasobra ningun momento nan ta sperando yegada di señora Luz Divina na Santo Domingo.

   A bay check su cas: Como cu e misterio a bira mas grandi, a dicidi na bay check su cas na Solito 42-A, cu ta situa como 90 meter patras di Lito Convenience Store.  Ora cu a bay paden, y no por a haya nada, na final a habri e freezer grandi cu e tin y aki a bin haya e curpa sin bida di señora Luz Divina.  Mesora a bati alarma, y autoridad hudicial a seya tur e lugar pa un investigacion grandi a start.  Esaki a socede Diasabra mainta dia 21 di November 2025. 

   Despues di a haci investigacion forensico, riba Diasabra mes a saca e Freezer di e adres y a bay cu ne pa investigacion.  Pero e parcela di cas a keda full seya henter anochi y marduga, vigila door di Polis como cu e ta wordo considera como ‘escena di crimen’.  Su interior a keda wordo documenta door di BFTO, y esey a sigui hasta riba Diadomingo.  Pa famia-, coleganan, y bisiñanan e hecho cu señora Luz Divina Faña di 60 aña a bay laga e mundo aki na forma cruel, a pone tur hende bay den tristeza.

   Enfoke riba sobrino: Pero testigonan a duna Recherche un monton di informacion y e enfoke a bay riba un sobrino di dje, kende a bin biba na Aruba tempo cu e mucha tin 10 aña di edad.  Awor e hoben tin 18 aña, conoci como Adrián Faña, y e ta esun cu a pusha e informacion cu su tanta a viaha pa Republica Dominicana.  Pero e hoben mes ta ausente e dianan ey.

   A bin sali na cla, cu prome cu tur e descubrimento aki a socede, e hoben a “colect” placa di huur di e dos apartamentonan, y lo a uza e placa pa cumpra pasashi di Aruba pa Panama.  Asina el a huy di Aruba pa no para responsabel pa loke el a haci.

   Pero kico exactamente a socede e ora, y esaki tin varios hipotesis, incluyendo uno cu e tanta Luz Divina no ta hopi contento cu e muhe cu e sobrino awor a start un noviazgo cu ne.  Segun prensa Dominicano, tin e teoria trambe cu e sobrino a bira furioso ora cu Luz Divina lo a bende un vehiculo SUV, y esaki lo a pone su fuse bula.  E pleito a escala, y finaliza cu e sobrino uzando un obheto skerpi a hinca cu forza su tanta monton di biaha.   Pero tur e puñalnan aki cu Adrián a hinca rond di curpa di e pober señora, a pone cu Luz Divina a sucumbi di su heridanan.  E sobrino no sa con pa sconde e curpa, y a dicidi na hink’e den e freezer.

   Buskeda internacional: Unico cos cu autoridad a haya sa ta cu Adrián Faña a bandona Aruba riba un vuelo pa Panama.  Y di eynan e pistanan posibelmente a bira “frieu” y no sa unda el a sigui.

   Toch Aruba a notifica Interpol di e buskeda di Adrián Faña di 18 aña, cu posibilidad grandi cu e lo regresa Republica Dominicana.  Awor ta sali na cla cu enberdad el a regresa e pais di merengue.

   Prensa Dominicano a raporta cu riba Diabierna 19 di December 2025 den oranan di atardi, oficialnan Dominicano laborando pa Interpol a cuminza yega cerca di su pista ora cu nan a haya sa cu e ta na Republica Dominicana, y a logra detene.  Awor Adrián Faña, kende ta procedente original di provincia María Trinidad Sánchez, ta deteni.

   Husticia Dominicano awor ta wardando e documentonan oficial cu ta pidi extradiccion di Adrián Faña pa e bin Aruba pa responde pa su actonan.  Unavez cu e procesonan aki socede, lo bay dura djis algun dia mas prome cu e por wordo treci pa Aruba.