Minister president Evelyn Wever-Croes mester cuminsa asumi su responsabilidad

Otami Thomasia di AVP ta convenci:

ORANJESTAD (AAN): Segun Otami Thomasia di Partido AVP, mirando e ultimo desaroyonan cu ta tuma lugar na Aruba por ripara cu tin un gran falta di liderato di parti di nos minister president Evelyn Wever-Croes.

   Un minister president di un pais mester ta responsabel y duna su pueblo un bon ehempel, banda di esey e mester ta honesto y e mester duna un bon ehempel di pone prioridadnan.

   E simpel hecho cu el a sostene minister di Finanzas Xiomara Maduro den su locura pa organiza un parada di lus ta duna pueblo un indicacion di un gran falta di liderato y prioridadnan.

   Nos pueblo ta den un crisis financiero unda no por / no kier paga e ambtenaarnan e 12.6 back di nan salario, pero tin placa pa parada di lus. Loke bo ta siña bo pueblo ta cu fiesta y bebemento ta na e prome lugar y despues    nos ta bay wak con nos ta bay paga nos debenan.

   Como lider di nos pais bo mester a para fuerte den bo sapatonan y mi ta sigur cu pueblo a respeta bo decision.

   Como lider di nos pais bo persona a bira un hende cu falta seriedad y cu pueblo no por respeta.

   E di dos caso unda bo persona a faya barbaramente tabata ora bo persona a permiti Minister Glembert Croes pa sobrepasa e decision di hues y permiti un persona ilegal drenta back Aruba..

   E di tres caso ta e caso di vacuna gate unda minister Dangui Oduber ta responsabel pa su ministerio y pa tur cos cu tin su firma bou di dje. Awor e momento atrobe a presenta pa bo persona Evelyn -Wever Croes actua y aplica e ley di Integridad. Si bo persona no tin e curashi pa aplica e ley aki cu a worde aproba den Parlamento e ta un comprobante cu bo no ta sirbi pa ta un minister president di un pais. Fuera cu cada minister tin su responsabildad, bo persona tin e responsabilidad di nan tur!

   Ya caba bo persona ta bay ta e minister president mas ridiculisa den Caribe.

Sali for di bo mundo di fantasia y cuminsa asumi bo responsabilidad manera debe ser!