Aruba tin un presupuesto cu di berdad ta pone su hendenan central

Parlamentario AVP Jennifer Arends-Reyes:

ORANJESTAD (AAN): Durante e debate di presupuesto nacional 2026, Parlamentario di AVP, Jennifer Arends-Reyes a trece na atencion cu e presupuesto actual ta refleha un direccion positivo, unda bienestar di pueblo, educacion, sostenibilidad y crecemento economico ta ocupa un lugar central.

“Nos ta trata cu un presupuesto cu ta kere den su pueblo. Aruba ta pone su hendenan prome, cu inversion den nos grandinan, muchanan, docentenan, y e economia real. Un Aruba unda bo por mira dilanti cu confiansa, sin lubida di e hoben profesional y studiantenan cu tin talento y compromiso pa sirbi su pais,” asina a enfatisa Arends-Reyes.

Durante su discurso, e parlamentario a pidi claridad riba varios punto importante, incluyendo:

• Mantenemento di infrastructura escolar: el a referi na scolnan grandi manera Colegio Arubano y Centro Deportivo di Playa, y pregunta kico e plan ta pa nulmeting y mantenemento regular.
• Digitalisacion: preguntanan tabata enfoca riba Digiborden, tech labs, y si programanan di coding ta incorpora den e curriculum.
• Educacion superior y acreditacion: Arends-Reyes a pidi claridad riba acreditacion di scolnan manera IPA y Universidad di Aruba.
• Restructuracion salarial y funcionamento: el a pidi splicacion detaya riba fase 1 y 2 di e restructura, y tambe si Aruba por evalua e posibilidad di tratamento mas faborabel pa docentenan cu studieschuld for di Hulanda (DUO).

E parlamentario tambe a trata temanan relaciona cu turismo, sostenibilidad y tension regional. El a expresa apoyo pa modelo di high value, low impact y a pidi claridad riba maneho y regulacion di short-term vacation rentals, e implementacion di un Aruba Certification Program, y proteccion di naturaleza den contexto turistico.

“Nos ta enfrenta un contexto global desafiante, pero cu claridad y planificacion, Aruba por bira un lider den e region,” Arends-Reyes a conclui. “Nos pueblo merece accion.”

Fraccion di AVP ta comprometi pa sigui eherce su rol den parlamento cu firmeza, vigilando cu cada florin cu ta gasta ta pa beneficio real di comunidad.