AHATA teniendo encuesta tocante bienestar na trabao riba Dia Mundial di Salud

ORANJESTAD (AAN): Aruba Hotel & Tourism Association lo tene dos encuesta riba Dia Mundial di Salud pa acumula informacion riba e nivel di bienestar di trahadornan y di e esfuerzonan di dunador di trabao pa beneficia e salud mental y bienestar di empleadonan.

   E prome encuesta lo bay via email pa e 136 miembronan di AHATA, pidiendo informacion tocante programa di dunador di trabao pa yuda mehora un empleado su bienestar mental.

   E di dos encuesta lo ta un ‘Employee Wellness Survey’ pa obtene un mihor bista di e salud mental na trabao cerca empleadonan di sector priva y e factornan cu ta contribui na stress na trabao. E encuesta aki lo ta disponibel cuminsando 7 April 2022, ariba AHATA su pagina di Facebook:

www.bit.ly/ahata2022

   E resultado di e encuestanan lo yuda AHATA tin mas conocemento di e factornan cu ta causa stress pa trahadornan y e tipo di programanan cu tin pa mehora bienestar na trabao. Cu e informacion aki e asociacion y su miembronan por genera mas idea pa implementacion den futuro.

   AHATA ta un organizacion di dunador di trabao cu ta traha pa e sostenibilidad di Aruba su turismo y economia, sosteniendo progreso socio-economico di comunidad.