President di Parlamento Edgard Vrolijk:
ORANJESTAD (AAN): E siman aki, president di Parlamento, Edgard Vrolijk a dicidi cu e tin di gradici Minister di Finanzas y Economia pa su excelente trabao unda nos por a tuma nota cu Aruba a ricibi un evaluacion excelente fo'i Caribbean Financial Action Task Force CFATF, ya cu nos Pais ta cumpli grandemente cu e regla nan pa preveni y combati labamento di placa y financiamento di terorismo.
Den Caribe ta Bermuda y Aruba ta e unico dos pais nan cu un resultado asina positivo. Un señal fuerte cu Aruba su sistema financiero ta integro y ta bon pa inversion y corespondencia bancario.
Un vision cla di 2017: Na momento cu Gabinete Evelyn Wever-Croes I a huramenta y cu tur caso di corupcion andando den caso di IBIS y Avestruz, $50.000 di sr Rincon pa sr Mike Eman, Minister Xiomara Maduro a pone un vision cla pa traha duro pa percura pa pone Aruba su nomber na halto. Asina a inventarisa e cambionan necesario den ley y a percura pa introduci e cambionan necesario y awe por wak cu e trabao duro a duna su fruto na e imagen di Aruba.
Pueblo mester ta consciente pa cuida imagen di pais Aruba: Pueblo mester ta conciente di e daño cu falta di integridad pero sigur actonan di corupcion por haci na imagen di nos pais manera cu AVP y sr Mike Eman a haci na imagen di Aruba. Pero danki na esfuerso incansabel di Minister Xiomara Maduro cu awe Aruba por tin un bon imagen pero sigur a trece confianza y a manda e señal cu nos pais tin un sistema financiero integro cu ta brinda oportunidad sigur di inversion y corespondencia bancario.
Pabien na Minister Xiomara Maduro cu a sa di traha sin descanso pa drecha imagen di Aruba pero tambe finanzas di pais Aruba den tempo di crisis.
