Trash by Ronchi ta presenta e coleccion di temporada di Pasco y Aña nobo

Awe durante Magia di Pasco den un show especial cu modelonan local

ORANJESTAD (AAN): Despues di un ausencia notable na programanan di television pa mas di un aña y mei, Ronchi De Cuba, director creativo di TBR a dicidi cu e aña aki ta participa na Magia di Pasco. 

E coleccion di temporada di fiesta ya caba ta den boutique y e tendencianan di moda internacional obtenibel caba aki na Aruba.  "Temporada di Fiesta pa 2021 ta kick start cu colornan vibrante y estampadonan estrambotico.  Alegria ta e punto di inspiracion mas notable pa cu coleccionnan di temporada" ta locual Ronchi a duna di conoce. 

Mirando di cerca e desaroyonan di moda internacional como tambe tendencianan di retail el a percura pa TBR tin un surtido sumamente varia pa asina cumpli cu gustonan y exigencianan di tur na Aruba. 

"Nos a percura pa ricibi e coleccionnan na tempo mirando cu di Augustus nos a nota cu lo tin retraso den envio internacional.  Esaki ta hasi cu ya caba nos por presenta un coleccion amplio di estilonan pa e temporada especial aki" Ronchi ta comenta. 

Awe Aruba lo mira e prome estilonan di locual ta bay domina e temporada di Pasco y Aña nobo di TRASHBYRONCHI.  Sintoniza Tele Aruba Canal 13 pa 9.10 pm pa asina mira e desfile aire libre prepara pa Aruba henter cu hopi amor.