Garantisa siguridad di espacio aereo y maritimo den region ta primordial

Prome Minister Mike Eman

ORANJESTAD (AAN): Gobierno a convoca un conferencia di prensa extraordinario riba diaranson merdia na Bestuurskantoor, caminda Prome Minister di Pais Aruba a duna informacion importante riba e situacion tumando luga den espacio aereo y maritimo den region.

Premier Eman a indica cu a tene diferente contacto cu stakeholders, agencia y instituto pa garantisa e siguridad di espacio aereo y maritimo den nos region. Esaki ta pa garantisa coredornan aero y maritimo den nos region pa garantisa trafico di barco y avion sin inconveniente.

Lo tin intensificacion di diferente ehercicio militar den region, esaki ta algo cu e comunidad mes tambe a tuma nota di dje. A tuma contacto cu Consul di Merca na Corsou relaciona cu e inkietud cu ta reina den e pueblo y asina a urgi Merca, a traves di canalan diplomatico pa avionnan den nos espacio aereo tin nan transponders cendi. Un palabracion cu a logra y di cual lo tene nan mes na dje.

Gobierno ta den contacto continuo entre e paisnan den Reino Hulandes y Merca, Directie Luchtvaart Aruba (DLA), Directie Scheepvaart Aruba (DSA), Directie Buitenlandse Betrekkingen (DBB) y Veiligheidsdienst Aruba (VDA) pa asina e trafico aereo y maritimo, muy particular esun comercial, por continua trankilamente den nos region.