Minister Arthur Dowers:
ORANJESTAD (AAN): Minister di Husticia, Arthur Dowers a indica cu Gobierno a tuma e decision pa cera e edificio di seccion di Rijbewijs na Santa Cruz temporalmente pa motibo cu esaki a deplorabel y inhumano. Apesar di e esfuersonan cu ta wordo haci pa e funciona na un manera optimal, tin hopi factornan cu no tan a luga.
Segun Minister Dowers, a tarda mucho largo pa cera e departamento aki. Den entrevista cu DIARIO, el a duna di conoce cu Gobierno di Aruba tin un plan pa revisa e funcionamento di e departamento aki pa asina haci e cambionan necesario pa pronto e por brinda atrobe e servicio cu e mester brinda.
Ademas di e edificio, Minister Dowers a indica cu tin hopi otro cos cu mester drecha den e forma cu ta atende cu e departamento di Rijbewijs entre otro e rijscholen, e cantidad di polis cu ta traha na e departamento aki, y e sistema. Minister Dowers ta pidi comunidad pasenshi mientras ya a cuminsa haci investigacionnan y plannan pa e structura nobo di e departamento di rijbewijs, sperando cu pronto por cuminsa wak e diferencia y mehoracion den e departamento.
