TSPA a retira Security guard cu a falta respet dilanti turistanan

Video a bay viral unda por a mire agredi cantante Rusty

ORANJESTAD (AAN): Un video a bay viral den fin di siman, unda por a mira con un funcionario di Tourism Security Patrol Aruba a perde tur clase di respet, y tambe no a worry cu e ta den zona turistico y dilanti turistanan, pa a acerca e conocido cantante Rusty pa start un pleito masha mahos mes.

   E pleito aki a wordo graba door di hendenan eybanda riba nan Smartphone, y tambe Security Video di e negoshi a capta tur cos.  Aki por mira e oficial di security ta garando y forzando Rusty (banda drechi).

   Asina un hende cu ta supose di defende turista, ta bay forma escandalo den bista di turistanan y spanta nan cu e bululu cu a wordo forma?   Danki Dios cu pueblo por a mira cu Rusty si a mira e importancia pa “chill” dilanti turistanan, y a keda busca forma pa de-escala e situacion.

   Rusty tabata bisa e security officer pa corda cu e ta den espacio publico, y pa e “behave yourself”. Pero e security officer aki tabata comosifuera e ta den un overdose di egoismo, y tabata kier a start un guera eynan mes.  Y su colega di patruya banda di dje, no a ni actua tampoco pa cos no escala.

   Ora cu e video a circula, ta centenares di reaccion por a lesa tur caminda.  Hendenan a comenta cu e oficial di security aki no sa kico ta bebe y come di turismo, y con su acto por mata e industria aki den un solo shot.

   Ni maske bo por tin problema cu Rusty, bo no ta bay haci esey durante bo ora di trabao y spantando turistanan.  Hopi hende riba social media a exigi pa e oficial aki wordo retira, of a lo menos haya un curso intensivo di 6-luna largo pa siña con pa drecha su “Human Contact 101”.

   Tin hende a hasta puntra si acaso esaki ta e tipo di trahador cu AHATA ta tuma pa defende turistanan of no.

   Reaccion di TSPA:  Mientras tanto, e organizacion di Tourism Security Patrol Aruba (TSPA) a reacciona riba e video.  Nan a saca un boletin encuanto e situacion:

   “TSPA ta consciente di un video cu ta circula riba social media cu ta mustra un incidente agresivo involucrando un empleado di TSPA. E incidente a tuma luga dia 27 di November 2025, anochi, den relacion cu un estacionamento no-autoriza riba caminda publico den hotel area. Nos ta compronde e preocupacion cu esaki a causa den e comunidad y entre nos bishitantenan. Nos kier dirigi un aclaracion directo riba e situacion.”

   “Prome cu tur cos, nos ta expresa nos disculpa sincero na pueblo di Aruba y tambe na tur nos bishitantenan. E conducta mustra den e video no ta aceptabel y no ta refleha e valor, profesionalismo ni standardnan cu TSPA ta compromete pa mantene. Nos mision ta pa garantisa seguridad, respeto y hospitalidad rond Aruba su playanan y zonanan turistico, y nos ta lamenta cu e incidente aki a daña e confianza.”

   “E empleado cu a keda involucra den e incidente agresivo no ta parti di e TSPA mas. Nos a tuma accion inmediato pa reforza nos protocolnan y pa implementa medidanan di re-entrenamento pa preveni cu comportamento manera esaki por tuma luga atrobe. Nos ta keda dedica na sirbi Aruba cu integridad y respeto. TSPA lo sigui traha hunto cu autoridadnan local, lidernan den comunidad y partnernan den turismo pa fortalece nos operacionnan y pa restaura e confianza den nos servicio.”

   “Nos ta desea tambe pa menciona cu sponsornan di TSPA ta conoci di e incidente y nan ta comparti nos sentimento di lamentacion. Nan sosten continuo ta vital pa nos por mantene e standardnan mas halto di seguridad y hospitalidad, y nos ta compromete pa honra nan confianza cu transparencia y mehoramento constante.”

   Un tip pa e security ey, bay busca yudanza contra e agresividad mahos ey!  Mihor, nunca mas busca un trabao den sector ey tampoco.