MEP ta haya mihor pa ‘Asuntonan di Reino’ keda den man di Prome Ministro

ORANJESTAD (AAN): Den e ley di LIM, partidonan AVP y Futuro a pone e cartera di “Asuntonan di Reino” bao minister Gerlien Croes,

pero net Gerlien Croes ta e minister cu menos lazo y relacion cu Reino. Mirando cu esun cu mas lazo den Reino ta e Minister President, y relacion den Reino ta hopi importante, Fraccion di MEP a entrega un mocion pa pasa e cartera bek pa e Minister President.

   Durante e reunion den Parlamento hopi a wordo bisa riba e posicion di minister Plenipotenciario.  Statuut di Reino ta stipula cu Aruba MESTER apunta un minister na Hulanda, e no ta lag’e facultativo. Aki na Aruba, ainda no a logra apunta un persona pa bay Hulanda, y no ta mucho cla di con no. Den prome instante a pensa cu ta minister Gerlien Croes no kier apunta un minister, pa e scapa placa. Pero den reunion minister Gerlien Croes a tira prome minister Mike Eman bou bus, y a bisa cu e decision aki ta den scochi di prome minister Mike Eman.

   Fraccion di AVP a entrega un mocion pa urgi minister Gerlien Croes pa nombra e minister cu urgencia, pero e mocion no a wordo acepta pasobra fraccion di Futuro a vota contra. Un cos ta obvio: e gabinete AVP Futuro ta hopi bruha, y no tin ningun bista ki tempo lo nombra un minister plenipotenciario na Hulanda. Esaki ta daña e imagen di Aruba na Hulanda y hustamente awor tin mester di un bon representante di Aruba na Hulanda.