Diesshete ciudadano porfin a bira doño di nan mesun cas

Traspaso di erfpachtakte

ORANJESTAD (AAN): Durante añas varios habitante di casnan di pueblo rond di Aruba a haya chens pa cumpra e cas cu nan ta bibando aden pa hopi aña largo. Varios a tuma e oportunidad aki y a cuminsa e proceso pa cumpra nan cas for di Fundacion Cas Pa Comunidad Arubano (FCCA).

Despues di aña, hopi habitante a logra paga nan cas por completo, pero ora a yega pa haci e traspaso a encontra un contratempo pa logra esey, pues e tereno tabata riba nomber di Pais Aruba y a keda añas asina. Desde cu Gabinete AVP-Futuro a sinta a pone como meta pa scucha nos comunidad, pa haya sa kico ta nan preocupacion y pa atende cu nan. Un di e preocupacionnan cu a bin dilanti ta di e habitantenan di e casnan di pueblo.

Mesora Prome Minister mr. Mike Eman a pone man na obra y riba 31 di juli 2025 a yama un reunion cu FCCA, DIP y DLV y na final di e reunion Prome Minister a sali bisa cu e habitantenan lo haya nan acta prome cu aña 2025 caba como regalo di Pasco.

Diabierna 17 di december tabata asina leu cu na Fort Zoutman diesshete (17) doño di cas a firma nan erfpachtakte pa por bira propietario di nan cas. Esaki a sosode memey famia di e doño di e casnan, notario Yarzagaray y su team, y FCCA.

Julie Wever, cu ta director tecnico y comercial di FCCA, a duna palabra di pabien na tur su clientenan cu awor tin nan mesun cas! E esfuerso no tabata entre FCCA su so pero tambe den man den man cu DIP y DLV.

Minister di Infrastructura Rene Baba Herdé a remarca cu casnan di pueblo ta un necesidad, asina por a mira rond di nos isla creacion di diferente bario. Ex-mandatarionan manera Mito Croes, E.J. Watty Vos y Henny Eman d.f.m. tabata personanan cu a cuminsa na pone atencion, pa haci e cambio necesario den vivienda social.

Prome Minister mr. Mike Eman a subraya e compromiso cu tin cu pueblo, den bishita di Accion di Bario a mira e necesidad aki. Palabra di elogio a bay pa e diferente personanan cu a haci traspaso posibel den corto tempo e.o. Haime Vingal di Ministerio di Asunto General, Luis Boekhoudt di DLV, Robert Maduro y Laurence Quant, Isabel Dammers di DIP, Davy Apuro, Mildred Britten, Julie Wever di FCCA. Jose Marie y Notario Yarzagaray.

E no ta facil pa FCCA haya e fondonan necesario pa construi cas. Tur dia FCCA ta labora duro; critica tin hopi for di mantencion y atencion n’e bario; pero e no ta facil pa maneha 45 area cu cas di pueblo rond di nos isla” premiere Eman a finalisa bisando dunando palabra di elogio na FCCA.

Gabinete AVP-Futuro ta yuda alivia e scarcedad di vivienda, stimula y sostene e proyectonan di construccion basa riba cooperacion entre sector priva y gobierno pa por alivia e demanda pa vivienda di bon calidad y pagabel.

Gobierno ta trahando pa reactiva plan di renovacion y revitalisacion di bario. Yuda nos profesionalnan hoben, famianan hoben pa yega na nan propio cas. Nos grandinan cu lo ta desea pa un lugar mas adecua pa nan biba.