ORANJESTAD (AAN): Seccion di Malesanan infeccioso conhuntamente cu seccion Cuido Salud Hubenil y Stichting Wit Gele Kruis Aruba ta organisando VacunaTHON Infantil, caminda lo brinda e oportunidad pa muchanan entre edad 5 cu 11 aña vacuna contra COVID-19.
E VacunaTHON Infantil aki lo tuma luga diasabra y diadomingo awo dia 22 y 23 di januari for di 9'or di mainta te cu 4'or di atardi, na Centro Libertador Betico Croes. Muchanan cu acudi lo haya e vacuna di Pfizer special pa mucha cu ta bin den un dosis reduci.
Mayoria mucha ta haña sintoma leve despues di un infeccion cu COVID-19, pero tin un grupo cu toch ta haya sintoma servero y por wordo interna. Tambe tin un grupo chikito di mucha cu por desaroya e malesa "Multisystem Inflammatory Syndrome Children (MIS-C)", cu ta un complicacion na organonan despues di un infeccion. E vacunacion contra COVID ta diseña pa duna proteccion na e muchanan aki, yuda preveni MIS-C y yuda preveni cu mucha tin sintoma a largo plaso (long-covid) despues di un infeccion.
Pa bin na remarke pa e vacunacion, e mucha mester tin edad entre 5 cu 11 aña y no mag di tawata contagia cu COVID-19 menos cu 12 siman pasa (despues di 1 november 2021), unda e mucha ta biba no mag di tin hende den isolacion, e mucha no por ta den cuarentena y no mag presenta na e VacunaTHON cu sintomanan di COVID-19.
Muchanan cu a ricibi nan prome vacuna di Pfizer of Johnson and Johnson den exterior por pasa busca nan di dos vacuna si nan a ricibi e prome vacuna mas cu 8 siman atras.
Pa facilita e proceso durante e VacunaTHON, nos ta pidi e mayor pa download Aruba Health App y registra e mucha na "add user". Tambe ta pidi pa solamente 1 mayor of voogd acompaña e mucha na e VacunaTHON, pa evita un multitud di hende demasiado grandi.
Riba dia di VacunaTHON mester presenta cu e carchi di AZV of informacion di AZV digital of paspoort si en caso e mucha no tin AZV.
E vacuna tambe ta pa mucha indocumenta cu tin minimal 4 luna bibando na Aruba pero cu no ta turista.
Ta warda mayornan cu nan yiunan pa asina e muchanan tambe por keda bon proteha y hunto por sigui cana y logra e recuperacion di nos pais.
Related News
Secretario di Estado van Huffelen lo participa na seminario ‘Hende Muhenan Fuerte’
Conocido promotor ta sigura cu un top artista grandi lo ta rumbo pa Aruba
Hospital ta contra bahamento di gasto den cuido y pesey a bin cu alternativanan
