AVP a tene reunion cu votadornan y a anuncia cu lo manda carta pa Hulanda

ORANJESTAD (AAN): Dialuna atardi pa anochi a tuma lugar un reunion urgente di AVP cu su votadornan.

   Segun AVP, hopi ciudadano preocupa y den expectativa a aglomera na cas di partido Playa, asina respondiendo na e yamada cu partido AVP a haci.  Por a mira ciudadanonan di varios orientacion politico a presenta na cas di partido pa asina uni nan mes na e lucha cu lo conduci “cu Aruba ta worde libera for di e Gobierno actual”.

   Pa motibo di e multitud cu a acudi, organizadornan di e reunion mester a translada e reunion for di den salanan di cas di partido pa dilanti di cas di partido. Un anochi cu un atmosfera di speranza, union y mas importante determinacion pa lucha pa pueblo y pais.

   E anochi a inicia cu varios discurso di Parlamentario y Candidatonan di partido AVP cu a expresa nan sentimentonan cu e multitud di ciudadanonan cu a presente motiva pa un cambio di direccion di nos Pais.

   Parlamentario Arthur Dower, Mike de Meza, Gerlien Croes, Mervin Wyatt Ras, Ryçond Santos do Nascimento y Benny Sevinger a hiba discursonan carga cu emocion y conviccion cu Partido AVP tin un ruta alternativa y tin un vision socio- economico pa salba nos Pais y a motiva e spirito di lucha den cada un presente.

   Candidato nan di partido AVP Muzaninn Wever, Clifford Heiliger y Wendrick Cicilia hiba discursonan emotionante y impactante cu a anima e multitud cu partido AVP ta e speranza.

   Lider partido AVP mr. Mike Eman a clausura e anochi cu un mensahe fuerte. E momento ta awor! Nos tin cu lucha pa salba e presente y e futuro di nos Pais. Un momento bunita cu a captura e esencia  di e anochi ta e momento cu lider di partido mr. Mike Eman a extende un man di union na tur esnan cu tin amor pa Pais Aruba pa den dialogo y union traha na bienestar di e nos Pais.

   Como simbolo y ehempel di e union aki lider di partido mr. Mike Eman e invita lider di partido CURPA, esta Eric Ras pa asina consolida e union cu tin mester pa asina hunto por bay hulanda cu un plan economico nobo pa asina nos por saca e pais for di e abismo cu Gabinete Wever-Croes a ocasiona.

   Lider di partido mr. Mike Eman e enfatisa cu tur gremio, sindicato, gremio comercial, NGO y tur organizacionan cu ta stima e pais aki mester uni den un dialogo social pa asina nos determina un rumbo nobo pa nos Pais, y partido AVP ta e unico partido cu por y a realisa esaki.

   AVP a bisa cu nan lo manda un carta pa Conseho di Ministronan di reino hulandes ta cu e comunidad di Aruba no ta bay acepta mas medida mientras cu amigo y famia di Gabinete Wever- Croes ta sigui enrikece nan mes cu fondonan publico.