MEP ta considera Arsenio (Chenco) Yarzagaray como un gran baluarte

Na Memoria  -  ORANJESTAD (AAN): Cu hopi tristesa partido MEP a ricibi e noticia cu un co-fundador, gran baluarte y ex-politico Arubano, Arsenio (Chenco) Yarzagaray a fayece.

   Chenco a nace dia 29 di maart 1938 y den su trayectoria profesional a ocupa varios funcion importante den comunidad, entre otro  e tabata e prome director di WEB Aruba N.V., Ministro di Economia pa Antiyas bao di Gabinete Don Martina, Parlamentario di Antiyas y miembro di Raad van Advies.

   Sin duda, debi na tur su labornan, el a haya un Condecoracion Real como Officier in de Orde van Oranje Nassau. Tambe el a ser condecora den e Orden Francisco de Miranda Venezuela.

   Chenco tabata un co-fundador di partido MEP y riba e prome lista na 1971. Tambe el a aparece riba lista na 1973, 1975, 1979 y 1985. Chenco a lucha schouder cu schouder cu nos Libertador Betico Croes y a fungi den varios comision pa prepara pa nos Status Aparte.

   Na ocacion di celebracion di 45 aña di MEP na november 2016, Chenco a tene un discurso elocuente y di motivacion pa henter partido. Tambe na ocacion di 50 aña di MEP na februari ultimo, Chenco a haya su reconocemento for di lider di MEP como muestra di gratitud pa tur loke el a haci pa MEP y Aruba.

   Partido MEP ta spera cu Chenco lo tin un bunita lugar den Reino Celestial. Nos condolencia ta bay na su esposa, su yiunan  y demas famia. Cu Chenco sosega na paz den brasa di Señor.

galleryMEP ta considera Arsenio (Chenco) Yarzagaray como un gran baluarte/gallery