Den Congreso reciente a haya señal cu ocupacion di hotelnan na Aruba ta bahando

Hose Figaroa, Presidente di FTA:

ORANJESTAD (AAN) Den entrevista cu Matutino DIARIO, e president di e Federacion di Trahadornan di Aruba “FTA”, mr. Hose Figaroa, a duna di conoce cu, recientemente, FTA tabata tin un Congreso, hunto cu nan delegadonan.

   El a bisa cu FTA a haya señalnan encuanto menos ocupacion di e sector hotelero, y e ta mira esaki den cifranan cu a wordo publica, locual e ta haya contradictorio pasobra si wak e cantidad di turistanan cu Aruba ta ricibiendo ta mustra cu e sector ta conoce un subida.

   “Sinembargo, na mesun momento e cantidad di cambernan cu toch ta ocupa, ta conoce un bahada. Esaki, probablemente tin di haber cu e fenomeno di ‘vacation rentals’. Aworaki, bo ta haya cu hopi turista ta scoge no solamente pa, na lugar di keda den hotel, haci uso di vocation rentals. Esaki kizas tin di haber cu e mercado di turismo”, Hose Figaroa, lider di FTA, a declara.

   El a agrega cu ta conoci cu e turistanan di Latinoamerica tin e tendencia di scoge p’esaki.

   “Riba su mes, vacation rentals no ta totalmente negativo pa nos economia. Vacation Rental mes ta genera un entrada cu pa Pais Aruba tambe, y recientemente den un entrevista di DIARIO cu directora di Impuesto, el a bisa cu DIMP ta registrando e vacation rentals.

   Di otro banda bo ta haya cu e turista cu ta bin eynan, no solamente ta bay gasta su cent den restaurant, etc., pero tambe ta haci hopi uzo di, por ehemplo, supermercadonan, unda eynan toch bo ta haya un fuente den benta, door cu e sistema di gasta di un turista cu ta uza vacation rentals, ta diferente. Di otro banda, e hecho cu hotelnan no ta yena of cu e porcentahe no ta mucho halto, esey tin un efecto si, riba e hotelnan. Nos no mester lubida cu na unda cu nos economia ta sostene riba dje, y sigur pa loke ta trata nos mercado laboral tambe, e ta depende hopi di loke ta hoteleria”, President di FTA, Hose Figaroa, a subraya’