Mas di 314 paki di marihuana confisca cerca di Riohacha prome cu a sali riba Go-Fast

RIOHACHA: E plan ta pa pone e cargamento di marihuana aki riba Speedboatnan tipo Go-Fast y busca forma pa yega Merca. 

Sea ta haci un viahe di Colombia pa Republica Dominicana, y despues cruza pa Puerto Rico, of ta uza un otro isla den Caribe pa yega eynan.

   Pero e plan a fracasa, pasobra autoridadnan Colombiano a dal narcotraficantenan cu ta opera den departamento di La Guajira un golpi duro, ora cu Ehercito Nacional y Polis di La Guajira a intercepta un lote grandi di droga.

   Ta soldatnan ta esnan cu a bin tuma nota cu un vehiculo a wordo bandona, y ora cu a bay revisa esaki, a bin haya 314 paki di marihuana tipo ‘creepy’.

   A compronde cu e droga aki ta wardando pa wordo poni riba speedboat pa bandona Colombia.  E cargamento grandi aki a bin ni un siman despues cu autoridad a intercepta un vehiculo coriendo den pueblo di Distraccion (como 70 km zuid di Riohacha) cu 150 kilo di marihuana scondi.