Fundacion Ban Uni Man pa Cria Nos Muchanan ta brinda desayuno tur dia na mas di 760 mucha

Señor John Fun

• Pa haci donacion por contact e fundacion libremente 

ORANJESTAD (AAN): Un vision na aña 2001, di un ciudadano ehemplar y preocupa, awe, 24 aña despues, ta un mision cu ta brinda desayuno tur mainta na mas di 760 mucha di 64 scol rond di Aruba. Cu e meta aki, y cu e pensamento cu un mucha cu stoma bashi no por studia, señor John Fun a funda e Fundacion Ban Uni Man pa Cria Nos Muchanan.

  Durante henter aña, Fundacion Ban Uni Man pa Cria Nos Muchanan ta provee desayuno pa muchanan, di kleuter pa scolnan secundario, cu ta bay scol sin desayuna. E fundacion ta conoci cerca tur scol na Aruba y nan ta avisa tur scol cu si tin mucha cu ta bay scol sin cu nan a desayuna, pa contact e fundacion.

  Señor Fun a remarca cu e fundacion ta yega na su fondonan principalmente cu envolvimento di sector comercial. Varios negoshi grandi ta aporta asina bon na e causa bunita aki y e aña aki e fundacion a dicidi pa duna algo extra. Tur dia ta entrega sandwich y algo di bebe y dos biaha pa siman ta pone algo extra, entre otro fruta of snacknan nutritivo. Y e meta ta pa logra cu tur dia muchanan haya algo extra.

   Señor Fun a comparti e preocupacion di mas grandi cu e fundacion tin. Esaki ta kico e muchanan ta come durante vakantie di scol. E ta lamenta cu ainda no tin un solucion pa esaki pero si intencion di logra pa e muchanan sigui haya desayuno den temporada di vakantie tambe.

   Pa contribui cu Fundacion Ban Uni Man pa Cria Nos Muchanan, por contacta nan libremente pa mas informacion. Pa brinda desayuno pa un mucha, ta costa 550 florin pa aña. Ciudadanonan por sponsor un mucha pa aña of por duna donacionnan manera cu nan por. Tur tiki ta yuda, segun señor John Fun.