Aruba mester un maneho integral pa adictonan ambulante

Eduard Pieters (PPA) ta indica cu limpieza cosmetico no t’e solucion

 ORANJESTAD (AAN): E situacion den centro di ciudad, specialmente e presencia constante di e adictonan ambulante, ta keda un preocupacion serio pa comercio, turismo y seguridad di nos pueblo.

   Diamars mainta, durante un conferencia di prensa directo na e area mas afecta, parlamentario Eduard Pieters (PPA) a bolbe trece dilanti e urgencia di un solucion real. Despues di e limpieza cosmetico cu KPA a haci algun tempo atras, e realidad ta mustra cu sin un acercamento integral, nos ta bolbe na mesun situacion: mas sushi, mas daño y mas peliger.

   Realidad di ciudad: E negoshinan den e area ta lucha pa sobrebibi. Prijs di huur halto, problema di parkeo, benta abou y kibramento constante den e negoshinan ta crea un ambiente hopi dificil y desagradabel. E molester y menasa cu e adictonan ambulante ta causa ta pone tur hende den tension: e clientenan cu no ta sinti nan safe, turismo ta afecta y e imagen di Aruba ta den peligro.

   Limpieza cosmetico a duna un pausa visual, pero no a ataca e rais di e problema. Aki mes Eduard Pieters a enfatisa: “Esaki no ta un problema di sushedad; ta un problema di salud mental, abandono y falta di accion structural.”

   Gobierno sin contesta: Un falta di respet pa Parlamento y Pueblo.  Ta asina cu dia 22 di october, fraccion di PPA a manda un serie di pregunta crucial na Minister Wyatt-Ras tocante e cambio di ley, rehabilitacion obligatorio y un plan integral pa maneha e adictonan ambulante. “Awe ta 1 di december, cinco siman despues y Parlamento no a haya niun contesta.

   Esaki ta bay contra e promesa di campaña cu AVP y FUTURO a haci, esta cu nan lo duna contesta den 2–3 siman na Parlamento,” Pieters a subraya.

   Mientrastanto, e problema ta sigui crece. Loke tabata “limpi” den september, awe ta un desaster atrobe. Esaki ta mustra cu limpieza sin ley y sin plan integral ta simplemente tempo perdi.

   Un Solucion Integral: Salud Mental, Rehabilitacion y Reintegracion y aki fraccion di PPA ta enfatisa cu e adictonan ambulante no ta criminal; nan ta hende cu un malesa mental cu mester tratamento profesional. “Desde 2013 tin un rapport completo riba e indicacionnan di salud mental di ex minister Visser di AVP, pero tin 12 aña cu Aruba no a implementa e recomendacionnan. Nos ta mira e consecuencia awe!”

   P’esey fraccion di PPA ta pidi pa un ley, cu por separa e adictonan ambulante for di caya den un forma humano y obligatorio. Bin cu un centro profesional pa tratamento, rehabilitacion y guia. Pero tambe tin un

un plan di reintegracion laboral pa evita pa nan bolbe cay den mesun spiral.

   “Un cooperacion y colaboracion inmediato entre minister Dowers, Wyatt-Ras y Eman ta necesario. Como tambe transparencia riba e plan cu Respaldo tin, cu awor ta stagna sin por haya mas profesional y  tereno pa construi un clinica adecuado”.

   Finalmente Eduard Pieters a expresa cu tempo pa promesa sin cumpli a caba. Aruba mester un solucion duradero, integral y humano. PPA ta para firme: e adictonan ambulante ta hende cu derecho na cuido y e habitantenan y comercio ta merece un centro di ciudad sigur y digno. Limpieza cosmetico no ta suficiente ni e solucion, Aruba mester un cambio real.