Pa otro aña tur formulario lo ta digitalisa den un trayecto cu a cuminsa ya na aña 2015

Directora di DIMP, señora Luenne Gomez-Pieters tocante digitalisacion:

• E estado di cuenta di tur contribuyente tambe lo ta disponibel digitalmente

ORANJESTAD (AAN): Directora di Departamento di Impuesto (DIMP), señora Luenne Gomez-Pieters, den un entrevista cu DIARIO, a menciona cu digitalisacion di procesonan a hunga un rol grandi den crecemento di compliance y den cumplimento na tempo. Loonbelasting ta na 90% di compliance. Pa BBO, 87% di compliance. Toeristenheffing, 92% di compliance.

   Segun Gomez-Pieters, si bay bek na aña 2015, e compliance tawata alrededor di 63% pa 68%. Señora Gomez-Pieters a remarca cu esaki a sosode tambe cu winstbelasting, na unda e formularionan di 2023 y 2024 por a wordo entrega digital.

   Pa loke ta trata inkomstenbelasting 2025, otro aña lo cuminsa cu e proyecto, hopi grandi, pa digitalisa esaki tambe. Cu digitalisacion, señora Gomez-Pieters a indica cu por spera cu restitucion lo wordo paga mucho mas lihe.

   No solamente lo digitalisa inkomstenbelasting na 2026, sino e estado di cuenta di tur contribuyente tambe lo ta disponibel digitalmente riba portal di Departamento di Impuesto. Te awo, esaki ta posibel pa comerciantenan drenta den e portal pa cumpli cu nan debernan di pago. Di e manera aki contribuyentenan mes por drenta e sistema pa wak si tin bebe, restitucion y por hasta cera un aregla di pago online, cu ta loke ta mas importante.

   “Esaki ta un adelanto hopi grandi den servicio pa e cliente na unda e cliente mes ta den control y no mester depende di un invorderaar pa por cera un areglo di pago. Pa otro aña tur formulario lo ta digitalisa den un trayecto cu a cuminsa ya na aña 2015. Mi ta gradici tur esnan di departamento cu a traha cu hopi determinacion pa logra e digitalisacion aki cu exito pa brinda un servicio eleva na pueblo. Un danki tambe na pueblo cu a duna nos e confiansa aki y na final di dia nos kier duna pueblo un bon producto”, señora Gomez-Pieters a termina ta bisa.