Tema huridico lo wordo presenta awe na apertura Aña Academico na Universidad

ORANJESTAD (AAN): Awe Diabierna lo tin apertura di Aña Academico 2022-2023 na Universidad di Aruba.

   Segun decano di e Facultad di Derecho, esta Ruth Bonnevalle-Kok, a bisa cu debi na e hecho cu nan ta ofrece lesnan pa sea Bachelor’s y tambe Master’s den Ley, unda nan ta haya les pa bira meester den Ley di Aruba, e biaha aki a escoge un tema huridico, y pesey nan a invita president di Corte Comun di Husticia di Aruba, Curaçao, St. Maarten, y Bonaire, St. Eustatius y Saba pa bin duna un discruso.

   Facultad tin Ley na Universidad ta conta pa 2022-2023 cu 150 studiante, di cual 25 studiante lo cuminza nan les pa prome biaha.  Nan lo haci uso di varios Profesor cu lo bin duna les como huesped.  E studiantenan aki por studia y bira sea Abogado, Huez, of Fiscal den futuro.

   Bonnevalle-Kok a bisa cu e Facultad di Ley ta esun mas bieu di Universidad di Aruba, y ya a bira indispensable den esaki.  Como cu nan ta chikito, e educacion ta basa su mes hopi biaha riba cada individuo, y semper toch lo keda acepta mas studiante.

   Pa bo sigui estudio na Facultad di Ley, e exigencia pa drenta ta hopi mas halto, sea cu bo tin minimo un diploma di VWO of a logra haya un Colloquium Doctum, of bo tin un diploma di Bachelor’s, y corda cu idioma Hulandes ta hopi importante tambe pa e studio.

   Riba potret por mira d.r.p.d. Ruth Bonnevalle-Kok, hunto cu studiante Kiara Arends, y Rector Viola Heutger.