Construccion di e di dos parke di molina di biento lo expande capacidad di produccion di energia di biento

Minister Glenbert Croes

ORANJESTAD (AAN) – Den su calidad di Titular di Energia, minister Glenbert Croes a anuncia den conferencia di prensa di gobierno di dialuna, cu ta bay expande e energia di biento na Aruba cu construccion di e dos parke di molina, y a declara cu pronto lo yama ayo na HFO (heavy fuel oil).

            E mandatario a rememora cu den 2008, Gobierno di MEP, lidera pa señor Nelson Oduber e tempo ey Minister Presidente, a duna e prome paso pa Aruba construi su prome parke di molina na Vader Piet.

Na aña 2009, el a drenta den funcion, produciendo  30 megawatt di coriente, cual ta ekivalente na 16% di e capacidad total di coriente cu Aruba tin mester.

            Pa e siguiente añanan Utilities Aruba, hunto cu WEB Aruba NV y NV Elmar, lo tin e tarea pa ehecuta e Plan Nacional di Energia di Gobierno, pa logra cu Aruba mes ta produci 45 pa 50% di su energia, cual ta limpi, renovable y pagable; y pa 2050, por logra di ta clima neutral. “Esta, cu nos a logra elimina tur emision di CO2 y si tin mes, cu nos lo tin suficiente produccion di energia limpi, pa compensa e cantidad di CO2 emiti” e dignatario a remarca.

            El a agrega cu ta pesey mes, Gobierno di Aruba ya a logra di interesa e compania Eagle LNG, pa suministra WEB cu gas natural, como e fuel di transicion.

            “Awe, e siguiente paso ta pa anuncia cu nos ta expande nos capacidad di energia di biento, cu e anuncio oficial aki. Asina, pronto nos lo yama ayo na HFO y bon bini na un futuro energia mas limpi, renovable, y cu prijs stabil. Tur esaki ta bon pa nos economia, nos salud y nos planeta. Pesey awe, ta un gran honor y un dia grandi y valioso pa Aruba, cu nos ta anuncia e di dos parke di molina di biento pa Aruba”, e mandatario a señala.