Britannia a bira campeon den campeonato Copa Aruba Bank den youth league

ORANJESTAD (AAN) – Diadomingo mainta a tuma lugar e final di Youth league damas di futbol riba e mini veld di Britannia cu dos tremendo wega.

E prome wega a bay pa e di tres y 4 lugar entre Estrella y Dakota caminda Estrella a gana Dakota 9 pa 1.

Den e di dos wega cu tabata pa  campeon e team di Britannia a gana RCA 3 pa 0 pa asina Britannia bira campeon di Copa Aruba Bank den Youth league.

Cu e score final di 3 - 0, Britannia Damas ta bolbe logra un otro titulo campeonil mas. E Lady Pumanan a demostra un caracter solido y tabata hambra pa logra un otro titulo. Durante e campeonato Britannia a trompica pero den e playoff final aki a demostra cu tur cos ta cuminsa bek na cero.

E dos seleccionadonan Bindiya Wadhani y Michaela Netto a contribui grandemente na e victoria di diadomingo anotando tur e tres golnan cu Bindi 2 y Mika 1. RCA di otro banda no a mustra e ekipo batayador cu nos a mira durante henter e campeonato. Awe sin duda tabata falta algo mientras RCA su goleadornan no por a haya e net di Britannia.

Na final Britannia a celebra nan di tantisimo titulo hunto cu nan fanatica.

E directiva di AVB a hasi entrega di e Copanan mas e medayanan na Britannia y RCA. Tambe a reconoce esnan cu e sobresali durante e campeonato aki. Esnan cu a haya premio individual ta Rookie Player - Sharrienne Vrolijk di Dakota, Ellen de Jong di RCA topscore cu 17 gol y MVP di e torneo Youth, Wendylaine Angela di Estrella.