Elmar, WEB y Utilities ta brinda transparencia completo den e proceso di expresion di interes pa cu generacion di energia di biento

Ministro Glenbert Croes:

ORANJESTAD (AAN): Durante conferencia di prensa Minister di Energia Glenbert Croes a elabora riba transparencia di e proceso pa loke ta trata e “Expresion of Interest (EOI)” pa cu e molinanan di biento na Rincon.

   Aruba tin como meta pa logra e nivel di zero pa cu e emision di Greenhouse Gas (GHG) pa aña 2050 y asina cumpli cu e acuerdo ‘Paris Agreement’. Pues, e meta ta pa depende mas riba energia renobabel como e fuente principal di energia den tur area/sector.

   Mirando e importancia di e proyecto aki pa Aruba y den cuadro di transparencia, Elmar, Web y Utilities a forma un ekipo pa loke ta trata e proceso di decision . Tambe a forma un comicion consistiendo di un representante legal, un representante cu experticio riba sostenibilidad y un representante technico pa duna conseho na esnan encarga pa tuma e decision di ken ta e mihor candidatonan.

  Pa Gobierno di Aruba ta importante pa tur esnan cu ta participa den e proceso aki tin credibilidad maximo y gobierno lo comparti den cuadro di transparencia tur informacion cu comunidad, gremionan y medionanan di comunicacion na momento cu tin informacion di e companianan selecta.