Electorado a scohe pa cambio y reformacion

E eleccion 2021 a duna un bista riba e rumbo cu Aruba ke sigui desaroya su mes. Si na 1971 MEP a lanta pa trece un reformacion den e constelacion Antiyano, 50 aña despues den historia un cambio no a ripiti su mes.

A pesar cu a base di e demografia di e pais ta tin tur ingrediente pa e partidonan cu ta boga pa un cambio y reformacion, obtene mas asiento den parlamento. Esaki ta trece cu ne cu e cultura di pueblo ta asina ancra den e cultura politica, cu un intervencion parlamentario no ta resulta den un cambio di un proyecto of maneho di gobierno.

Na 1983 tabata e ultimo eleccion cu nos a conoce e fenomeno di un partido mayoritario, pa despues entrante 1986 drenta den e era di un gobierno di coalicion.

E resultado di 25 juni ta indica cu mester bin un gobierno di coalicion di tres partido. Di e 12 partidonan cu a participa na eleccion 2021, solamente 5 a cualifica pa drenta parlamento y ta nifica cu nos sistema politico no tin espacio pa 12 organisacion politico. Apesar cu durante e campaña Accion 21 tabata haci referencia na p.e. e modelo fiscal-economico di Singapore, aki aya no a scucha e otro partidonan inclui nan vision pa cu Union Europeo/Hulanda den nan argumento. Y di e manera aki poniendo nan ponencia den un contexto mas amplio. Si despues di binimento di e ‘Acuerdo di Schengen’ na 1995 por a ripara cu den parlamento di Aruba brevemente tabata señala e desaroyonan na Hulanda; parlamentarionan mester sigui inclui un contexto regional of di Reino como angulo den nan debate.

Debatenan
E debatenan riba e diferente plataformanan tabata hopi informativo y profundo. Asina e maneho di cultura a figura pa prome biaha riba e agenda politico, den cual a combersa cu diferente candidatonan politico. Lamentablemente cu ora ta referi na e ‘industria creativo’ ta uza un definicion limitativo di cultura y ta exclui literatura y papiamento cualnan ta fundeshi di e identidad di un pueblo. Un pregunta cu a haci falta durante e talk-shows den cuadra di modernizacion di gobernacion ta: con por aumenta e nivel di debatenan den parlamento? Te ainda e debatenan conoce un miro pa paden y ta mescos cu un pleito entre bisiña den cual esun ta zundra e otro. Cu otro palabra falta cierto profundidad, contexto y alternativanan coherente na un vision pa futuro. Un parlamentario su tarea ta pa analisa su documento, conduci propio investigacion, verifica si tin leynan aplicabel of ta haci falta y haci preguntanan al caso. Ademas e mester por entrega cu asistencia di WJZ - durante e 4 añanan - por lo menos cuater concepto di ley pa keda aproba den parlamento pa coregi, amplia of reforma e maneho di un ministro.

Reformacion
Cu binimento di Status Aparte a spera cu den e periodo di preparacion lo a bin un reformacion of adaptacion di e.o. nos enseñanza cu enfoke riba cultura, literatura y papiamento. E tempo ei a opta pa e.o. bin cu un Plan Nacional di Desaroyo, omitiendo pa adapta nos codigo civil cu añanan

despues a keda implementa. Pues a drenta den un relacion nobo den Reino cu leynan anticua, un modelo di enseñanza no-productivo y un economia y mercado laboral no-regula. Ta di admira cu den e partidonan grandi tin voznan interno ta resona cu cada decada mester bin cambio y reformacion di e.o. enseñanza. Ta bay cu ta maneha Pais Aruba na un forma mas eficiente y eficaz. Mester por crea un economia cu ta cubri parti di e gastonan, sin cu ta cay den un deficit riba presupuesto.

Conclusion

Cu e proximo gobierno mester bin cu reformacion riba tereno economico, fiscal, administracion publico y enseñanza ta inevitabel. Pa esaki ta rekeri un agenda di ehecucion, den cual a base di un calendario defini ta realisa e proyectonan. E tempo di traha rapport pa actualisa e conocemento di un hefe of contribui na deliberacionan sin por tuma decision, mester pertenece na pasado. Si tuma na consideracion cu 33.4% di e votadornan no a vota pa un di e partidonan grandi, por deduci cu tin un movimento di reformacion ta lantando cabes. Ta di spera cu den nos democracia e partidonan cu no a saca un asiento, sigui profila y vigila e trabounan di gobierno y parlamento. Sino Hulanda lo impone reformacionnan irealistico y despues cu CoHo keda efectua, por spera mas sorpresa cual solamente atraves di un posicion fuerte di gobierno y un dialogo por yega na un consenso.

© Quito Nicolaas