Conviasa a suspende vuelonan despues di investigacionnan riba avionnan Venezolano-Irani

ORANJESTAD (AAN): Tur cos ta mustra cu e caso di e Boeing 747-300M misterioso di e aerolinea Emtrasur cu a ateriza na Aruba na luna di Mei,

y despues desde algun siman pasa caba ta stagna na Argentina pa motibo di actonan sospechoso di e tripulantenan, awor ta pone cu e aerolinea Conviasa na Venezuela a tuma un decision.

   Conviasa ta e aerolinea di regimen Maduro, bao di cual e avion Boeing 747 di Emtrasur ta operando.

   Awor Conviasa a informa su pasaheronan cu a cumpra pasashi pa Argentina y Chile, cu e vuelonan programa e siman aki, pa y for di Caracas, a wordo suspendi te cu proximo aviso.  Como excusa nan a duna “motibonan operacional” den nan decision.

   E vuelonan cu a wordo cancela pa Conviasa ta VO-3550 di 27 Juni, saliendo di Maiquetia rumbo pa Buenos Aires, tambe VO-3551 di 28 di Juni for di Buenos Aires pa Maiquetia.

   Tambe a cancela pa Conviasa, vuelo VO-3790 di 29 di Juni, saliendo di Maiquetia rumbo pa Santiago di Chile, vuelo VO-3791 di Santiago di Chile pa Maiquetia.

   Den su decision, Conviasa no a duna splicacion y tampoco a duna un fecha cu nan ta calcula cu e vuelonan lo sigui.  Pero si ta conoci cu aworaki tin un serie di investigacion andando door di autoridadnan di varios pais na Sur America, riba e avion di Emtrasur cu a pone tur autoridad di inteligencia rond mundo bati alarma.

   A sali na cla cu Conviasa ta usando varios otro avion mas di Mahan Air (di Iran), y cu supuestamente tin tripulantenan Irani riba e vuelonan ey tambe como personal di cabina.

   Autoridadnan na Chile a bisa cu nan lo no bay laga un avion di e caracteristica asina bin ateriza.  Nan a bisa cu si e avion ateriza na Chile, nan lo bay investiga con e convenio ey ta hinca den otro, pa check si e avion ey lo por bula den espacio aereo di Chile.

   Manera ta conoci, Mahan Air ta un aerolinea sanciona internacionalmente debi na su envolvimento y sosten na operacionnan terorista.  Pesey mes e Boeing 747-300M di Emtrasur ta cu beslag na Argentina, ora cu a descubri cu un general di Guardia Revolucionario Islamico ta abordo.

   Di e tempo ey tur avion cu Conviasa ta usando di Mahan Air pa bula ruta di Argentina y Chile ta bao investigacion.  Pesey regimen di Maduro lo no tribi di laga e avionnan ey bay drenta espacio aereo di Argentina y Chile por lo pronto.