Acuerdo di cooperacion firma entre aeropuerto di Caribe Hulandes

ORANJESTAD (AAN): Durante un ceremonia virtual, directornan general di seis aeropuerto comercial di Caribe Hulandes a firma un 'Acuerdo di Cooperacion' cu a formaliza e "Dutch Caribbean Cooperation of Airports " (DCCA).

E meta di DCCA ta mehora calidad general di cada aeropuerto individual, facilitando asistencia mutuo y intercambio eficiente di informacion, transferencia di conocimento, intercambio di experiencia, pa asina logra siete tema clave den e acuerdo, cu ta inclui, entre otro, innovacion, sostenibilidad, regulacion, siguridad y proteccion, retonan di salud pa aeropuertonan, asistencia y maneho di emergencia, conexion aereo, economia sostenible stabil y accesibel, mantenimento, infraestructura y maneho di proyectonan.

CEO y directornan general di aeropuertonan di Aruba, Saba, Sint Eustatius, Sint Maarten, Bonaire y Corsow a expresa importancia riba e evento historico y nan ta spera di por logra e metanan pa medio di un asistencia mutuo y colaboracion. Durante e ceremonia di firmamento, nan tambe a expresa na compromiso pa logra e obhetivo di haci e region di Caribe un lider den prueba y estimulo di vuelonan electrico como e proximo generacion den aviacion.