DPL y Aruba Food & Beverage Association ta invita  pueblo en general y buscado di trabao en particular

“Job Fair” na Renaissance Convention Center, Dialuna proximo 20 di Juni:

ORANJESTAD (AAN) – Lionel Croes, Marketing Manager di Departamento Progreso Laboral (DPL), a duna informacion den conferencia di prensa, dirigi na tur e personanan cu ta buscando trabao, tocante su participacion den e “Job Fair” cu ta bay tuma lugar dia 20 di Juni proximo, na Renaissance Convention Center, di 11’or mainta te 8’or di anochi.

Croes a menciona cu DPL a ricibi un invitacion di “Aruba Food & Beverage Association”, pa di e forma aki tambe forma parti di e Feria di Trabao, cu lo tuma lugar Dialuna 20 di Juni.

E funcionario a bisa cu DPL lo tey presente pa difundi informacion y pa registra esnan cu ta buscando trabao. Croes a expresa cu DPL ta hopi contento pa nan forma parti di e feria y sigui stimula e participacion laboral, pasobra esaki ta e meta, proposito y vision di e Ministerio di Labor.

Lionel Croes a indica cu ya caba for di 2011 ya caba DPL ta brindando e servicio aki na su team di Job Center, pa sigui stimula participacion laboral. E team atento y masha colegial di Job Center lo tey presente den e Feria di Trabao. Croes ta invita tur pueblo di Aruba pa atende e feria aki, pasobra e ta importante, no solamente pa esnan cu ta buscando trabao pero tambe pa esnan cu kier un cambio di trabao, of esnan cu a caba scol, pa nan bin busca informacion.

Lionel Croes a expresa cu esaki ta netamente un gran oportunidad pa ta presente, busca informacion, registra tambe y wak cual ta e posicionnan cu tin disponible den diferente restaurant cu lo forma parti di e feria di trabao aki.

“Di parti di DPL nos ta convenci cu trahando hunto nos ta logra nos meta, por logra mas, y sigui stimula participacion laboral”, Lionel Croes a reitera.

DPL su obhetivo principal ta e intermediacion tanto na e buscado como na e dunador di trabao. Pues e dunador di trabao tambe por bishita e feria di labor aki, y busca informacion na DPL.

Esnan cu ta buscando trabao y cu no ta registra na DPL via nan plataforma, tin personal di e instancia aki cu lo tey presente y pa esnan cu kizas no sa ainda con pa yena e formulario pa bay riba e plataforma, DPL tin un guia specialmente pa nan. Kiermen, nan oficina lo wordo transporta pa e “Job Fair” unda su team tey pa provee informacion y yuda registra. DPL lo suministra informacion tocante otro vacantenan cu tin, fuera di area di hotel y turismo. Asina Lionel Croes a señala.

Brevemente, señora Carolina Merryweather-Raven, presidente di Aruba Food & Beverage Association, a hiba palabra, indicando cu mesora cu el a tuma contacto cu e ministerio tocante e Job Fair cu nan ta organizando, nan bisa cu nan ta duna un man y a tuma contacto cu DPL.