Parlamentario Shailiny Tromp Lee kier mas claridad riba situacion peligroso na Palm Beach

ORANJESTAD (AAN): Awe mainta den Parlamento ta bay tuma lugar e di 4 reunion publico, cu dos topico riba agenda.

Esaki parlamentario di fraccion di MEP Shailiny Tromp Lee a trece dilanti durante un conferencia di prensa Diaranzon mainta.

El a splica cu un di e topiconan ta e presupuesto di D.O.W di 2021 y e otro ta riba e comisionnan fiho di Parlamento.

“Pa loke ta e presupuesto di 2021 e tratamento ta un tiki laat, pasobra nos ta den 2021 caba”.

Sinembargo, despues di e repasa e presupuesto aki ami sigur lo bay pidi atencion pa e situacion cu nos tin actualmente na e cruzada grandi banda di Palm Beach na Noord.

E ta un proyecto cu por cierto ta keda nombra den presupuesto di 2021, pero cu nos por a ripara cu e no a wordo converti ainda den un rotonde, segun Tromp.

El a splica cu pesey lo pidi atencion pa esaki.

Segun e parlamentario, el a tuma contacto cu minister di Husticia pasobra como un persona cu ta frecuenta e caminda ey diariamente e parlamentario a tuma nota di varios accidente eynan.

“Mester por bin un solucion pa e situacion aki y un claridad di parti di Gobierno riba kico ta bay tuma lugar na e area aki, pa crea un solucion pa e situacion peligroso”, segun Tromp.

El a splica cu recientemente a pone drempel, pero e cu no ta wak esaki como un solucion duradero.

E parlamentario lo enfoca tambe riba e Waterzuiveringsinstallatie na Bubali Plas.