Avion Dash-8 di Guardacosta a yuda localiza piscadornan perdi di St. Lucia

ORANJESTAD (AAN): Riba Dialuna, e asina yama Joint Search & Rescue Center (JRCC) di Guardacosta di Caribe Hulandes,

a ricibi un peticion di MRCC Fort de France, pa yuda den e buskeda y rescate di un boto di pisca di St. Lucia cu ta nabega bao di e nomber ‘God’s Son’, cu no a regresa St. Lucia mas.

   RCC mesora a pone e avion di Guarda Costa lanta vuelo for di Curacao, esta e Dash-8 cu a bay Islanan Ariba y a cuminza busca e boto perdi aki.

   Den menos di un ora cu el a yega, nan a bin haya e boto ‘God’s Son’ cu tres persona abordo.  E avion Dash-8 a benta bolanan di huma den e area di e boto, pa asina un tankero den vecindario, esta MV Seabord Ranger por a localiza e boto y rescata e piscadornan.

   Nan a pidi e tankero pa cambia su ruta y acudi na e lugar unda e boto ta.  E tankero a haci esey y a bin topa cu e boto di piscadornan.  Nan a yuda e tres piscadornan bay abordo, y a move rumbo pa St. Lucia.

   Den cercania di e capital Castries na St. Lucia, e piscadornan a wordo transferi na e Guardacosta di St. Lucia.  Ningun di e piscadornan tabata rekeri asistencia medico.

   MRCC Fort de Frances ta e centro di Search & Rescue pa e Area Caribense banda pariba, bao di cual e islanan di St. Maarten, St. Eustatius y Saba ta cay pa loke ta actividadnan di buskeda riba lama.