Minister Arends a confirma cu a pone moratorium pa vergunning di Taxi y Autobus

Ta realisando estudio riba situacion actual

ORANJESTAD (AAN):  Recientemente Conseho di Minister a aproba un proposicion di minister di transporte sr. Ursell Arends, pa trece un maximo cantidad di permiso nan cu ta wordo otorga segun  ordenancia di transporte publico (moratorium). E maximo aki ta conta pa taxi, autobus, toerwagen, ongeregeldvervoer, verhuurauto's y verhuurmotorfietsen.

            Minister Arends a haci e proposicion aki mirando e falta di informacion analitico riba e situacion actual den e mercado di transporte. A logra un cooperacion cu Universidad di Aruba pa nan haci un estudio riba e capacidad di carga pa loke ta trata e diferente permisonan cu ta wordo otorga pa transporte publico. E estudio lo enfoca riba e varios pregunta pero den especial: cuanto permiso di transporte publico nos mercado tin espacio pe na e momento aki?

            Universidad di Aruba desde cu firma un MoU, a inicia e trabou di colecta datonan importante riba uzo, frecuencia, prijs, demanda, y tambe efecto social di transporte publico. E estudio aki ta premira di lo tuma mas o menos 3 pa 4 luna pa termina.

            E cantidad maximo cual a ser ahusta a drenta na vigor 1 di maart 2022, y lo ta valido pa un periodo di 1 aña. Ta informa na mes momento cu e ultimo cantidad maximo (moratorium) ta basa riba data di 27 di september 2017 y a termina 26 september 2019. Moratorium ta conta solamente pa peticion pa permiso nobo, y ta exclui renobacion di un permiso existente of traspaso di un permiso (overschrijving) segun nos reglanan y maneho vigente.  Minister Arends ta spera di por ricibi resultado di studio cu datonan concreto pronto pa asina fiha un mihor maneho pa transporte publico.