President Diego de Cuba di Sindicato STA ta den shock pa mira e salario di CEO nobo Aeropuerto

ORANJESTAD (AAN) President di Sindicato di Trahadornan di Aruba (STA), Diego de Cuba,

den entrevista cu DIARIO a declara cu ainda ta sinti su mes den shock, cu e noticia di e salario cu e director nobo di Aeropuerto ta bay haya.

   “Pasobra nos a kere cu e cosnan aki no ta pasa mas riba e pida baranca aki cu yama Aruba. Den nos concepto e ta practicamente inaceptabel, locual cu ta sosodiendo aki”, De Cuba a subraya.

   El a agrega cu desde Juni 22, tin un ley cu a drenta na vigor, cual ta delinea cu un persona den un funcion halto den gremio gubernamental, lo por disfruta di un salario maximo pa luna 130% compara cu e salario di Prome Minister, cual ta yega na un montante di mas of menos 271 mil florin pa aña.

   “Anto, aworaki nos ta tende cu e cabayero aki ta bin traha como CEO na Aeropuerto di Aruba y ta bay gana riba un miyon florin pa aña. Nos ta bisa cu e asunto aki no ta bon. Bo ta kibrando caba e ley cu Aruba mes a bin cu ne”, Diego de Cuba a señala.

   El a agrega cu si gobierno ta bay desvia asina tanto di dje, anto e mes ta creando problema innecesario.