Caso di homber cu a hinca su tanta cu cuchio posponi

ORANJESTAD (AAN):  Diahuebs mainta e homber C.M. a presenta den sala di Corte di Husticia pa e caso penal cu Ministerio Publico a cuminsa contra dje.

Fiscal a acusa C.M. di intento di asesinato riba 13 di December 2021 door di hinca e dama W. cu cuchio na su torso. E dama W. a presenta den Corte. E pareha di C.M. tambe tabata presente.

            Durante tratamento di e caso, por a nota cu abogado mr. de Sousa no tabata presente. Fiscal a bisa Hues cu e abogado mr. de Sousa a manda un carta pa pospone e caso. E ora ey Hues y Fiscal a conseha C.M. pa mihor pospone e caso, mirando cu ta un acusacion hopi serio. A keda dicidi cu ta pospone e caso 

VICTIMA A RECLAMA CU SOSPECHOSO TA GAÑA

            Promer cu e posponemento di e caso, Hues a cuminsa interoga C.M. riba kico a sosode. Hues a puntra C.M. si e acusacion ta berdad. C.M. a bisa Hues cu e asunto tabata un problema di famia. Segun C.M., door cu su tanta W. kier a agredi su ex amiga cu tabatin un baby den man, el a coy cuchiu y hinca W.

             E momento ey, W., a lanta su man y bisa Hues cu C.M. ta gaña. Hues a bisa W. cu e no por bisa nada durante tratamento di e caso. Por a ripara cu ora cu C.M. tabata bisa cosnan na Hues, W. tabata sacudi cabez, mustrando cu C.M. ta gaña. Na dado momento e traductor di Corte a bisa W. pa e keda keto pasobra no ta permiti pa haci asina durante tratamento di caso. E ora ey, W. a stop. 

HOMBER TA HINCA TANTA CU CUCHIO

             Hues a mustra cu W. a bisa Polis cu tabatin problema na apartamento di C.M. na Sero Biento. Tabatin un discusion entre C.M. y e ruman nomber di W., M. Parce cu nan tabata bou influencia di alcohol. Na dado momento W. a intermedia pa stop e problema. E problema a bira mas serio pasobra C.M. a skop W. bisando cu ta pa W. su culpa tur e problema a cuminsa. Esey a causa cu C.M. y W. a cuminsa bringa cu otro y M. a para e pelea. Segun W., C.M. a bay den cushina y bolbe cu un cuchio. Promer W. a kere cu ta M. a wordo hinca pasobra su paña tabata na sanger. Pero a resulta cu ta W. mes a resulta herida. El a sufri un hinca na su torso. 

POSPONE CASO

            Ta asina cu durante tratamento di e caso, Fiscal a bisa Hues cu abogado mr. de Sousa a pidi pa pospone e caso pasobra e no por tabata presente. Hues e ora ey a puntra C.M. si e ta na altura di esaki. Segun C.M. e no tabatin contacto cu mr. de Sousa. El a bisa Hues cu e no a papia ainda di e caso cu e abogado. C.M. tabata kier a sigui cu e caso pero Hues a bisa C.M. cu ta na bienestar di C.M. pa tin un abogado mirando e seriedad di e caso. Fiscal na su turno tambe a bisa cu ta mihor pa C.M. busca asistencia di abogado. E ora ey C.M. a bisa cu e ta bay di acuerdo pa pospone e caso pa asina e papia cu su abogado.

            Fiscal a remarca cu un di e condicionnan cu a laga C.M. den libertad tabata cu C.M. mester a bay Reclassering. Fiscal a bisa Hues cu Reclassering a informa cu C.M. no a presenta. C.M. ta para riba cu el a bay Reclassering y a duna tur informacion di dje. El a bisa Hues cu 1 dia despues di a sali for di KIA el a bay na Reclassering.

            Hues a pospone e caso pa tempo indefini. El a bisa C.M. pa e bolbe bay Reclassering y pidi un prueba riba papel cu e tabata eynan.