Hulanda mester reduci asistencia financiero Hulandes!

​

Manera DIARIO a adverti a wordo anuncia oficialmente pa Gobierno

*Adaptacion Defensa Hulandes na situacion mundial nobo confirma

*Maneho Gobierno Wever-Croes ta evita impacto pisa pa Aruba 

ORANJESTAD(AAN)—Ya prome cu 2023, DIARIO continuamente a mustra su lectornan riba e realidad di problemanan gubernamental Hulandes, cu na final di 2023 a culmina y a entrega e resultadonan electoral cu cambio politico enorme pa Hulanda y Reino.

DIARIO a guia Aruba cu informenan di expertonan cu ta sostene e produccion di DIARIO a base exigencianan di periodismo enfrente un pais, cu mester ricibi amplio preparacion pa desaroyonan cu ta na caminda.

E eleccion na final di 2023 a anuncia final di e era Mark Rutte cu a kibra record pa e tempo cu el a fungi como Prome Ministro di e pais, pero na mes momento a laga un herencia cu mester a wordo adapta na forma urgente na e realidad nobo Hulandes.

E concepto cu Hulanda mester duna prioridad na e bienestar di e Hulandes, cu ta paga e peso mas pisa den Reino, a bira e base di cambio politico total y surgimento di Geert Wilders como e lider politico nobo di Hulanda cu for di Parlamento ta exigi e cambio di maneho Hulandes manera expresa den eleccion.

DIARIO a adverti Aruba, cu e resultado lo tabata cu Hulanda lo mester a cuminsa atende na prome lugar cu problemanan financiero di e pais, cu mester atende cu condicionnan nobo pa asina democracia bira realidad pa e pagador di belasting di Hulanda.

Ya den e prome conceptonan di e programa di gobernacion di Hulanda a bini dilanti, cu Hulanda na prome lugar mester duna prioridad na construccion di un pais cu ta atende cu e bienestar di su habitantenan cu necesidad di vivienda y areglonan cu directamente ta mishi cu calidad di bida di e Hulandes.

E crecemento di pobreza na Hulanda durante e ultimo añanan a bira intolerabel na e pais cu riba lista di paisnan mas rico di mundo.

E aumento di pobreza di poblacion Hulandes ta directamente resultado di e peso cu Gobierno ta pone riba su habitantenan cu no ta ricibi a cambio di nan placa di belasting loke nan merece.

Prinsjesdag, e Dia cu Rey Willem Alexander como cabez di Gobierno na nomber tambe di e Conseho di Ministro a presenta na Parlemento y Senado Hulandes, uni den Staten Generaal, e base pa gobernacion di e pais durante e aña Parlamentario nobo, a papia di cambio sumamente importante pero tambe e necesidad di Gobierno di Reino pa atende cu su gastonan relaciona cu yudansa financiero cu paisnan Hulandes den region di Caribe.

Aki mester tene cuenta cu tin dos grupo di pais Hulandes den Reino. Tin Aruba, Sint Maarten y Curacao cu ta goza di nan autonomia pero tin e grupo di BES, cu ta directamente mara na Hulanda cu ta Bonaire, Saba y Sint Eustatius cu ta separa tambe den e programa di accion di Reino Hulandes.

Gabinete Evelyn Wever-Croes ayera a confirma e maneho Hulandes cu a haya refleccion den e presupuesto Hulandes cu a wordo presenta durante Prinsjesdag.

El a confirma cu fondonan cu tabata destina pa Aruba, Bonaire y Curacao, pa diversificacion di economia y e fondo di crecemento di e paisnan, a wordo corta na forma significante.

Prome Ministro Wever-Croes a splica cu su Gobierno ta keda optimista enfrente otro fondonan cu tabata destina pa Aruba.

DIARIO den otro articulonan den e proximo dianan lo informa su lectornan na forma mas profundo riba e resultado di e hecho cu e situacion financiero Hulandes no ta permiti continua cu loke a wordo planea originalmente.]

Na mes momento DIARIO lo bolbe splica kico tanto studiantenan na Hulanda y personanan cu kier bay biba na Hulanda mester spera den e situacionnan nobo na e pais, cu mester a baha e sumanan cu e ta bay gasta riba e terenonan aki tambe.

Por a spera adaptacion di maneho financiero di Reino na situacionnan nobo na mundo, cu ta den un situacion basta serio.

Mientras e caida di prijs di petroleo ya ta marca e necesidad pa atende cu tur loke por stroba un bon structura pa evita tur tipo di inflacion, e conflictonan mundial ta haci cu e paisnan mester gasta mas na proteccion di nan teritorio.

Manera DIARIO a anuncia algun tempo pasa, placa pa Defensa Hulandes mester a wordo adapta pa asina sostene e necesidad di Reino pa un bon defensa tanto pa loke ta trata personal como inversionnan den e cuadro mundial actual.

Manera for di 2022 a prepara lectornan di DIARIO, na 2024 Aruba, Reino y mundo ta prepara pa enfrenta 2025 cu ta bira un aña crucial pa hasta humanidad.

Informantenan di DIARIO ta sigui mustra cu e maneho di Gobierno Evelyn Wever-Croes a haci cu Aruba por confronta e futuro, cu e contenido di e presupuesto y maneho financiero di Reino, sigur ta confirma.