The content originally appeared on:
Diario
Mientras caida prijs di petroleo lo afecta economia di Venezuela tambe
*Nicolas Maduro ta celebra Pasco den tension cu ta mata e angel di paz
*Nicolas sin avion presidencial y Venezuela sin lider di oposicion liber?
ORANJESTAD (AAN) — Manera DIARIO a pronostica, e continuacion di Nicola Maduro na poder na Venezuela, ta transforma su mes na un situacion sumamente explosivo dilanti porta di Venezuela.
Analisando loke ta pasa actualmente na Venezuela hunto cu experto riba diferente tereno, na prome lugar ta bini dilanti, cu ya mester papia di diferente situacion sumamente serio, pero cu realmente ta wordo mas o menos nivela den presentacionnan internacional.
Central den e problemanan ta keda e hecho cu Nicolas Maduro ta nenga di acepta e resultado di eleccionnan liber, loke ta un acto contra democracia y proclamacion pues di un dictadura, cu tin sosten di Rusia cu ta un poder mundial.
Manera expertonan ta trece dilanti, ora papia di Venezuela no ta papia solamente di Nicolas Maduro, pero ta papia directamente di tur e aliadonan sumamente importante na nivel mundial, manera Rusia, cu por percura pa un problema cu Nicolas Maduro por escala den un rato.
E inseguridad mundial ta crece rapidamente cu problemanan na diferente pais baluarte di democracia y sigur mester tene na consideracion e situacion actual di Merca, cu ta na caminda pa un eleccion.
E hecho cu Merca a dicidi cu e ta captura e avion presidencial di Nicolas Maduro, ta un acto sumamente importante y sigur motibo di preocupacion.
E poder personal di Nicolas Maduro como dictador no ta e realidad mas serio den e actual panorama mundial, cu conoce un culminacion di conflictonan peligroso den cual lidernan mundial por perde nan cara pero tambe por topa cu un publico hopi confuso na nivel mundial.
Paisnan cu mester hunga papelnan determinante na nivel internacional, ta duna muestra di instabilidad of debilidad politico of manera ta e caso na Merca, ta den e proceso electoral cu semper ta afecta normalidad di gobernacion.
Si ya den mundo politico tin instabilidad, economia cu ta e base importante di poder di placa na mundo, tambe conoce su turbulencia.
Ora observa e prijsnan di petroleo, por papia di un caida considerabel sigur si tene na consideracion cu a wordo spera cu prijs di petroleo lo surpasa 100 Dollar pa baril na 2024, pero awor a baha bou di 80 Dollar pa baril y den ciarto casonan di productornan di petroleo hasta ta acerca 70 Dollar pa baril.
Esaki ta crea perspectivanan importante di economia mundial, cu ta e base di forsa financiero di mundo pero tambe di paisnan poderoso.
Si tene cuenta cu tur aspecto presente actualmente, mester papia di e culminacion pa cual DIARIO a adverti den porta di Aruba y den cual mester papia di un confrontacion abierto na Venezuela riba tereno politico.
Na momento cu Merca a apodera di e avion presidencial di Nicolas Maduro na Santo domingo, e kier a demostra cu e no tin miedo di Nicolas Maduro, cu mester respeta reglanan internacional den gobernacion.
Na Venezuela e lider di Oposicion na nivel nacional, Edmundo Gonzalez, a mustra cu e no ta hala atras pa Nicolas Maduro y cu e no ta bandona Venezuela pa motibo di e amenaza di detencion di su persona dor di Nicolas Maduro.
Esaki ta nifica cu e decision electoral di Venezuela cu sosten mundial no ta hala atras pa Nicolas Maduro, cu na su turno ta tene na e poder di petroleo cu ainda ta den su man pero tambe na su aliansa cu paisnan peligroso pa paz mundial.
Mientras e cantidad di petroleo den reserva mundial a auamenta y asina a haci cu e prijs di petroleo a baha, e arma di Nicolas Maduro como pais petrolero ta wordo afecta.
Sinembargo, mester tene na consideracion cu e unico forma pa Nicolas Maduro hala atras, ta pa e entrega rienda di e pais na democracia, manera mayoria di Pueblo Venezolano a dicidi y ta haya sosten di mundo liber.
Venezuela lo conoce un solucion pa su problema of Venezuela lo sigui cana riba e caminda pa un guera civil, cu un aspecto mundial?
E contesta ta keda na horizonte di Aruba, cu un peligro creciente den porta di cas.
Ta den e situacion aki Nicolas Maduro a dicidi pa cuminsa prepara pa fiesta di Pasco cu el a decreta cu lo cuminsa celebra for di luna October.
Mundo ta observa esaki como un forma pa deshaci di atencion di e situacion peligroso di e pais, cu ta rumbo pa un guera civil y momentonan sumamente peligroso pa e region di cual Aruba tambe ta forma parti.
