The content originally appeared on:
Diario
Jayburtt Dijkhoff, director SIKI:
*Den salud tur hende tin un of otro rol pa hunga!
ORANJESTAD (AAN)—Dr. Jayburtt Dijkhoff, Director di SIKI, den entrevista cu DARIO tocante e datonan aporta pa e rapport STEPS, a bisa cu na Aruba hopi adelanto a tuma lugar den salud, pa loke ta trata e parti curativo, pero e parti preventivo tambe mester su atencion.
Esaki ta un punto cu despues di tanto decada, di tur gobernacion y tur Gabinete, awo por cuminza traha mas structuralmente. El a referi na e parti unda tabata tin e Hospital bieu, y cu el a bira profesional cu aworaki nos tin HOH. “Hopi avance a tuma lugar den e parti curativo pero e parti preventivo tambe merece su atencion. Esey ta disfruta di bida, y esey por, esey ta parti di nos cultura, pero a yega tempo pa nos hacie na un manera mas saludable tambe”, Dijkhoff a acentua.
El a agrega cu si nos wak kico PAHO y Organizacion Mundial di Salud y otro organizacionnan internacional ta bisa, tur ta bisa mesun cos. “Salud mester ta, eigenlijk integral y holistico den tur aspecto di maneho di gobierno.
“Pakico? Pasobra practicamente tur cos ta toca salud. E hendenan cu ta keda den cas di hende grandi tambe por haci movecion. Con nos por stimula pa nan tambe move. Con nos por stimula cu nos ta comiendo lo corecto. Nos sa kico pa come, kico ta haci nos bon, kico ta haci nos malo. Y e stakeholders mester t’asina amplio cu practicamente tur hende tin un of otro rol pa hunga, pa eleva e concientizacion y pa nos por sigui e rumbo di un Aruba berdaderamente saludable”, Jayburtt Dijkhof, director di SIKI, a señala.
